Շարունակում ենք ոգեշնչել ու ոգեշնչվել մեր գործատուների հայրենանվեր գործունեությամբ։ Հոկտեմբերի 28-ն է և արդեն մեկ ամիս է ինչ անդադար մեր հերոս տղաներին, հայոց բանակին ու սեփական հողից տեղահանված արցախցիներին ուղղված աջակցության հոսքը չի դադարում։ Այլ բան չէր էլ կարելի սպասել, քանի որ մեզ հայ են ասում, իսկ ընկերությունը՝ հայկական կամ հայաստանյան։
Դե ինչ, ծանոթանանք մեր թիկունքի հերոսներին ու միանանք այս հրաշք նախաձեռնություններին։
RENDERFOREST
Պատերազմի առաջին իսկ օրից Renderforest-ը միացավ պայքարին մի քանի նախաձեռնությամբ՝
ֆինանսական՝
- Ռենդերֆորեսթի զարգացման և պահուստային ֆոնդերից ֆինանսական նվիրատվություն իրականացվեց Արցախի Հանրապետության ֆինանսների նախարարությանը։
- Կասեցվեցին բոլոր բենեֆիթների ու թիմային հանդիպումների համար նախատեսված ծախսերը, որոնք ներդրվեցին փոքր նախաձեռնությունների մեջ, ծախսվեց մոտ հավելյալ 1,5 մլն դրամ։
- Աշխատակիցներն ակցիա անցկացրեցին՝ կոչ անելով բոլորին իրենց աշխատավարձի նվազագույնը 15% փոխանցել ՊՆ-ին։ Այդ ակցիայի շրջանակներում հավաքվեց և փոխանցվեց ևս 5մլն դրամ Արցախի Հանրապետության ֆինանսների նախարարությանը։
Մասնագիտական`
«Հաղթելու ենք և վերջ» տեղեկատվական տեսանյութն արդեն շատերիս է ծանոթ, այն նույնպես իրականացվել է Renderforest-ի աշխատակիցների կողմից։
Տեխնիկական՝
Մշտապես կապի մեջ լինելով ՊՆ աշխատակիցների հետ և գնահատելով բանակի կարիքները՝ ընկերությունում անհրաժեշտ սարքավորումներ են պատվիրում և ուղարկում մեր զինվորներին։
Կամավոր աշխատանք՝
Ararat Box սթարթափի հետ միասին Renderforest-ի թիմը փաթեթավորեց քաղցրավենիքով լցված 2կգ-անոց 400 տուփ, որոնք ուղարկվեցին Ստեփանակերտից ու սահմանամերձ բնակավայրերից ապաստարաններ տեղափոխված երեխաներին։
«Մինչ մեր հաղթանակի բաղձալի պահը՝ մենք շարունակելու ենք նոր ու ավելի մեծ աջակցությունների շարքը թե՛ թիկունքից ու թե՛ առաջնագծից։ Հպարտությամբ ենք հետևում, թե ինչպես են մեր աշխատակիցները նաև անհատական նախաձեռնություններով ու կամավորական աշխատանքներով աջակցում մեր Հզոր Բանակին»:
Հաղթելու ենք։
AAB Construction
AAB Construction ընկերության ողջ անձնակազմը ևս մեծ ոգևորվածությամբ և միայն ու միայն հաղթանակի ակնկալիքով միացել է հնչեցրած բազմաթիվ կոչերին և իր ներդրումն է ունեցել հայրենիքի պաշտպանության և ամրապնդման գործում: Աշխատանքային թիմի միաձայն որոշմամբ իրականացվել է
- Ֆինանսական աջակցություն և թիմի կողմից փոխանցվել է 2.205.000 ՀՀ դրամ:
Սահման է ուղարկվել՝
- դեղորայքային տարբեր միջոցներ,
- բեռնատար մեքենաներ և տեխնիկական սարքավորումներ:
Ունենք աշխատակիցներ, ովքեր այս պահին ևս սահմանին են և մեծ պատվով փորձում են պաշտպանել մեր և մեր հայրենակիցների խաղաղությունը և ապրելու իրավունքը։
DIGITAIN
Ցանկացած քայլ կատարելիս յուրաքանչյուրիս մտքում մեկ գաղափար է՝ ինչպես է սա օգնելու իմ երկրին:
Եվ վերջին մեկ ամսում էլ Դիջիթեյնի յուրաքանչյուր քայլ առաջնորդվում է հենց այս մտքով: Ներգրավվելով թիկունքում դիրքերն ամրապնդելու և համընդհանուր աջակցություն ապահովելու գործում՝ ընկերությունը համախմբեց իր ուժերը մի քանի ուղղություններով ծրագրեր իրականացնելու համար։
Ֆինանսական աջակցություն տրամադրելու նպատակով առաջին իսկ օրերից աշխատակիցների շրջանում ներքին դրամահավաք իրականացվեց, որի վերջնական արդյունքը ընկերությունը, գրեթե տասնապատիկ անգամ ավելացնելով աշխատակազմի կողմից հավաքված գումարը, փոխանցեց «Հայաստան» Համահայկական հիմնադրամին։ Ի դեպ՝ այս նախաձեռնությունը շարունակական բնույթ է կրում:
Բոլորի ջանքերի շնորհիվ հավաքված նվիրատվությունից զատ՝ ընկերությունն այլընտրանքային ճանապարհ գտավ Արցախից ժամանած ընտանիքներին ֆինանսապես աջակցելու համար՝ դառնալով Hover Dilijan Boutique-ի կազմակերպած նախաձեռնության մասնակից: Արդյունքում Արցախից ժամանած կանանց կողմից պատրաստված ավանդական ամենահամեղ ժենգյալով հացը ժամանեց Դիլիջանից՝ լցնելով Դիջիթեյնցիների օրը արցախյան ջերմությամբ և համ ու հոտով:
Կարևորելով նաև աշխատակիցների տեղեկատվական իրազեկվածությունը՝ Դիջիթեյնը կազմակերպեց հանդիպում-քննարկում մեդիափորձագետ Սամվել Մարտիրոսյանի հետ:
Իրականում վստահորեն ուզում ենք նշել, որ հանդիպումը լի էր հաղթական էմոցիաներով, պրակտիկ խորհուրդներով ու օբյեկտիվ դիտանկյունով: Արդյունքում Դիջիթեյնցիների ներդրումը տեղեկատվական հարթակում դարձել է է՛լ ավելի թիրախային և արդյունավետ։
Digitain-ում վստահ են, որ հաղթանակի ուժը նաև ստեղծագործ միտքն է. ըստ այդմ էլ ստեղծեցին ներկայիս թեմատիկայով, հաղթական տրամադրությամբ սթիքերներ՝ դրանք ինտեգրելով նաև WhatsApp, Telegram, Instagram հարթակներում։ Ի դեպ՝ դրանք կարող եք գտնել Artsakh Strong անվանումով:
Իսկ Դիջիթեյնցիները, բացի ներքին միջոցառումներից, անմասն չեն մնում տարբեր հասարակական նախաձեռնություններին և կամավորական նախագծերին մասնակցությունից:
#ՀաղթելուԵնք. մեր ուժը մենք ենք։
TELCELL
#500plus500 ԱՄԵՆ ՕՐ. մեդիա ակտիվիստներն արդեն կռահեցին ինչ արշավի մասին է խոսքը։ Նպատակը՝ նվիրատվությունը դարձնել սովորություն ու առավել շատ միջոցներ հավաքագրել ողջ Հայաստանից: Telcell Wallet էլեկտրոնային դրամապանակով յուրաքանչյուր օգտատիրոջ օրական նվազագույնը 500 դրամ նվիրատվությանը Telcell-ն ավելացնում է ևս 500 և 1000 դրամ փոխանցում հիմնադրամին: Ասեք, որ հիանալի գաղափար է ամեն օրդ նվիրատվությամբ սկսելը, օրինակ՝ մեկ բաժակ սուրճի գումարն ուղղելով Արցախի շենացմանը: Յուրաքանչյուր ներդրում կարևոր է. միասին#500plus500 ԱՄԵՆ ՕՐ:
Ահա այսպիսի արշավով էլ Telcell-ը հակազդում է թշնամու բոլոր հարվածներին՝ միասին էլ ավելի ամրացնելով մեր հայրենիքի թիկունքն ու ճակատը։
Telcell-ը նաև պատերազմի հենց առաջին օրերից միացավ համազգային դրամահավաքին ու նվիրատվություն կատարեց «Հայաստան» համահայկական հիմնադրամին ու Զինծառայողների ապահովագրության հիմնադրամին՝ իր օրինակով ոգևորելով մյուսներին: Ոգեշնչող է նաև այն, որ ընկերությունը կրկնապատկեց երկու շաբաթում իր օգտատերերի կողմից Telcell համակարգով հավաքագրված 15,000,000 դրամն ու փոխանցեց «Հայաստան» համահայկական հիմնադրամին:
Մեր Telcell-ի սիրելի թիմակիցներն այսօր առաջնագծում են՝ կողք կողքի կանգնելով մեր զինվորների հետ հանուն հայրենիքի։ Խաղաղություն բոլորիս։
Հաղթելու ենք։
Այս միասնությունն է, որ զորություն է տալիս բոլորիս ու ամեն օր մեկ քայլ ավելի մոտեցնում մեր այդքան սպասված ՀԱՂԹԱՆԱԿԻՆ։ ՄԻԵՎՆՈՒՅՆ Է ՀԱՂԹԵԼՈՒ ԵՆՔ։ Նախագծի բոլոր թողարկումներին կարող եք հետևել ստորև՝
Հատուկ շնորհակալություն ենք հայտնում բոլոր այն ընկերություններին, կազմակերպություններին ու անհատներին, որոնք մեծ նվիրվածությամբ այս հերոսական օրերին օժանդակում են ՄԵՐ ՀԱՅՐԵՆԻՔԻՆ։
