«Լավ ինթերները միշտ էլ աշխատանքի առաջարկ ստանալու ավելի լավ հնարավորություն ունեն»,- Սուրեն Շահինյան, ՄԱԿ ՄՌԿ Ավագ մասնագետ

Կարիերայի ինչպիսի՞ հնարավորություններ կան Միավորված ազգերի կազմակերպությունում (ՄԱԿ), ինչպե՞ս մրցունակ աշխատանքի դիմում կազմել, ի՞նչ հիմնական առանձնահատկություններ պետք է ունենա ուղեկցող նամակը, ինչպիսի՞ ծրագրեր են գործում, որոնց շնորհիվ անձնական կարիերա ստեղծելը շատ ավելի իրատեսական կլինի, այս և մի շարք այլ հարցերի մասին իր ելույթի ժամանակ մանրամասն ներկայացրեց պրն Սուրեն Շահինյանը, ով զբաղեցնում է Մարդկային ռեսուրսների կառավարման բաժնի Ավագ մասնագետի պաշտոնը ՄԱԿ-ի նյույորքյան գրասենյակում։

Հոկտեմբերի 11-ին Հայաստանի ամերիկյան համալսարանի Շրջանավարտների և կարիերայի զարգացման
գրասենյակի (ACDO)-ի կողմից կազմակերպվել էր հանդիպում-քննարկում պրն Սուրեն Շահինյանի հետ, որին
ներկա գտնվեց նաև staff.am-ից Նազելի Բադալյանը Ձեզ համար լուսաբանելու, թե որոնք են միջազգային
կազմակերպությունների արտոնությունները և առավելությունները որպես գործատու, և ինչպիսին պետք է լինի Ձեր աշխատանքի դիմումը, որպեսզի համարվի հաջողակ և մրցունակ։

«Ես ՄԱԿ-ի աշխատակազմում աշխատանքի անցա 1996 թվականին, երբ հաջողությամբ հանձնեցի Երիտասարդ կադրերի աշխատանքի ընդունելության քննությունները (National Competitive Recruitment Examinations), և առաջինն էի որպես Հայաստանի քաղաքացի, որ պաշտոնապես դարձա ՄԱԿ-ի միջազգային աշխատակազմի անդամ։ Սկիզբը շատ դժվար էր, թեև Նյու Յորքում աշխատելու առաջարկն այդ տարիներին թվում էր շատ համակրելի։ Հիշում եմ իմ առաջին Կողմնորոշման դասընթացի (Orientation training)-ի ժամանակ, երբ ՄԱԿ-ի արդեն փորձառու աշխատակիցները մեզ հետ հանդիպումներ էին անցկացնում, ասացին, որ ես չեմ կարող այդ կազմակերպությունում գումար խնայել և հարստանալ, բայց ձեռք կբերեմ հարուստ միջազգային փորձ, աշխարհը և աշխարհի տարբեր մարդկանց ու մշակույթները ճանաչելու լավ հնարավորություն», – թերևս այնուհետև պրն Շահինյանն ավելացրեց, որ այսօր աշխատավարձը պրոֆեսիոնալ անձնակազմի համար բավականին մրցակցային է։

Եվ իսկապես, հավելենք, որ ներկայումս միջազգային կազմակերպությունները որպես գործատու առանձնանում են իրենց բենեֆիթների և առավելությունների մեծ փաթեթներով։

Այնուհետև պրն Շահինյանը ներկայացրեց, թե ինչպիսին պետք է լինի թափուր աշխատատեղի համար պոտենցիալ թեկնածուների PHP-ն (Personal History Profile) ՄԱԿ-ի կարիերայի հարթակում, որպեսզի դիմումը համարվի հաջողված։

Նախ պետք է հաշվի առնել, որ ցանկացած կազմակերպությունում թափուր աշխատատեղի համար մրցակցությունն ընթանում է ինչպես կազմակերպության ներքին անձնակազմի, այնպես էլ կազմակերպությունից դուրս այլ պոտենցիալ թեկնածուների միջև։ Ուստի շատ կարևոր է, որ Ձեր PHP-ն համապատասխանի այն աշխատանքին, որին դիմում եք՝ անպայման ներառելով պահանջվող հմտությունների մասին տվյալներ և ուղեկցող նամակ։ PHP-ի կառուցվածքին համապատասխան անհրաժեշտ է տրամադրել պահանջվող տեղեկատվությունը, քանի որ դիմումը հիմնականում դիտարկվում է երկու փուլով։ Այն թեկնածուները, որոնք միայն ունեն պահանջվող հմտությունները և փորձը, կդիտարկվեն Long list-ով։ Այն թեկնածուները, որոնք բացի բոլոր պահանջվող հմտություններից և փորձից, ունեն նաև ցանկալի հմտություններ, կունենան առավելություն և կդիտարկվեն Short List-ով։ Բոլոր Short List-ով անցած թեկնածուներն արդեն կմասնակցեն հաջորդ ընտրական փուլին՝ ներառյալ գրավոր քննություն և հարցազրույց։

ԴԵ ԻՍԿ PHP-Ի ԿԱՌՈՒՑՎԱԾՔԻՆ ԿԱՐՈՂ ԵՔ ՀԵՏԵՎԵԼ ԱՅՍՏԵՂ․

  Անձնական տվյալներ,
  Կրթության և հրապարակումների մասին տեղեկատվություն (միջազգային կազմակերպությունները խիստ
կարևորում են կրթական հաստատությունները, հետևաբար նշելիս հավաստիացեք, որ այն ներառված է
UNESCO-ի ցանկի մեջ),
  Աշխատանքային փորձ (Գործատու կազմակերպությունը նշելուց զատ, անհրաժեշտ է հիմնական կետերով
նկարագրել Ձեր պարտականությունները, նվաճումները և թե ընկերությանն ինչպիսի աջակցություն եք
ցուցաբերել),
  Լեզուներ՝ կարդալ, գրել, խոսել, հասկանալ,
  Դիմորդին աջակցող և երաշխավորող անձանց անուններ (References),
  Ուղեկցող նամակ (Cover letter), որը պետք է լինի տպավորիչ և ինչ-որ տարբերվող կետով Ձեզ
առանձնացնի մյուս թեկնածուներից,
  Նախնական դիտարկման հարցեր (Pre-screening questions):

Իսկ ելույթի վերջում մի քանի հարցով փորձեցինք բացահայտել HR ոլորտում միջազգային փորձի առանձնահատկությունները։ Մասնավորապես, staff.am-ի հարցին, թե միջազգային կազմակերպություններում ի՞նչ HR գործիքներ են օգտագործում մասնագետները, որո՞նք են համարվում պարտադիր և կիրառելի կլինեն նաև Հայաստանում, պրն Շահինյանը պատասխանեց․

HR-ի ասպարեզը միշտ էլ կախում ունի կյանքի բոլոր փոփոխություններից, լինեն թե նոր տեխնոլոգիաների, թե աշխատակազմի կյանքի որակի և աշխատանքի, ապրելաձևի հետ կապված փոփոխություններ, որոնք մեծ ազդեցություն ունեն աշխատակազմի արդյունավետության վրա։ Ուստի, HR մասնագետը միշտ պետք է բարելավի իր մասնագիտական գիտելիքները, տեղյակ լինի և տիրապետի նոր տեխնոլոգիաների, որոնք կօգնեն աշխատանքում։ Այդ առումով, ՄԱԿ-ում վերջերս ներդրվեց նոր SAP տեխնոլոգիան, որը հանդիսանում է ինտեգրացված կառավարման համակարգ բոլոր HR և կադրերի հետ կապված հարցերի համար՝ պայմանագրեր, աշխատավարձեր և այլն։ Այդ համակարգը հաջողությամբ օգտագործվում է ոչ միայն ՄԱԿ-ի համակարգի կազմակերպություններում, այլ նաև մասնավոր սեկտորի շատ ընկերություններում։

Մեծ զարգացում և փոփոխություններ է ապրում նաև Integrated Talent Management՝ կադրերի կառավարման համակարգը, որն օգնում է HR մասնագետներին ավելի սերտ աշխատել իրենց կազմակերպության ղեկավարության հետ և ավելի ռազմավարական ազդեցություն ունենալ կադրերի բարձրակարգ և արդյունավետ աշխատանքի վրա։ Այդ ինտեգրացված համակարգում ներառված են կադրերի հետ կապված բոլոր ոլորտները՝ կադրերի որոնում (outreach), կադրերի հայթայթում (recruitment, staffing), որակավորման բարձրացում (training/learning), աշխատանքային արդյունավետություն (performance management and engagement), կարիերայի զարգացում (career development and succession planning) և վերջապես կադրերի ռազմավարական պլանավորում (strategic planning): Այս ինտեգրացված համակարգն առանձնահատուկ է յուրաքանչյուր կազմակերպության համար՝ կախված նրա բիզնես նպատակներից և ծրագրերից, սակայն մոտեցումները HR մասնագետի տեսանկյունից և նրանց ներգրավվման առումով նույնն են։ Խորհուրդ կտամ HR մասնագետներին հետևել և բարելավել իրենց գիտելիքները ու փորձը այս երկու՝ SAP և Intergrated Talent Management ոլորտներում, որոնք կարևոր են HR մասնագետի զարգացման և կայանալու համար։

– Իսկ ի՞նչ խորհուրդ կտաք այն շրջանավարտներին, որոնք նոր են առաջին քայլերը կատարում աշխատաշուկայում։

Այն շրջանավարտներին, ովքեր նոր են ավարտում և դեռ չունեն աշխատանքային փորձ, խորհուրդ կտամ փորձել մասնակցել ՄԱԿ-ի ինթերնշիփի ծրագրերից որևիցե մեկին, լինի դա Հայաստանում, Եվրոպայում, թե նույն Նյու Յորքում։

Ցավոք, ՄԱԿ-ի ինթերնշիփը վճարովի չէ, կազմակերպությունը հոգում է միայն վիզայի հարցերը, իսկ մնացյալ ծախսերի մասին պետք է հոգան ինթերները։ Բայց, հնարավորության դեպքում, այս տարբերակը շատ նախընտրելի ձև է ՄԱԿ-ի աշխատանքներին ծանոթանալու համար, ինչպես նաև աշխատանքային ասպարեզում Ձեզ ներկայացնելու և դրսևորելու համար։  Լավ ինթերները միշտ էլ ավելի լավ հնարավորություն ունեն ճանաչվելու և աշխատանքի առաջարկ ստանալու։

Եվ իհարկե, ՄԱԿ-ում աշխատելու համար պարտադիր չէ սկսել հենց կարիերայի սկզբից, հնարավոր է նաև մի քանի տարի աշխատել նմանատիպ ոլորտներում, ինչպես մասնավոր, այնպես էլ միջազգային ու հասարակական սեկտորում, որից հետո անցնել աշխատանքի ՄԱԿ-ում։ Նշեմ, որ ՄԱԿ-ը շատ մեծ նշանակություն է տալիս այն մասնագետներին, ովքեր ունեն լավ ազգային, և այլ միջազգային կառույցներում աշխատանքային փորձ։

Շնորհակալություն ենք հայտնում պրն Շահինյանին նմանատիպ ինֆորմատիվ և օգտակար ելույթի համար, ինչի շնորհիվ մենք ծանոթացանք միջազգային հարուստ փորձին։ Ուստի հետևեք այս խորհուրդներին Ձեր PHP-ն ավելի մրցակցային դարձնելու համար։ Ինչպես նաև նկատի ունեցեք, որ եթե ցանկանում եք աշխատել միջազգային կազմակերպություններում, ուրեմն սկսեք կամավորական, ինթերնշիփային և այլ երիտասարդ պրոֆեսիոնալների ծրագրերից, որոնք այսօր լայն հնարավորություններ են ընձեռում Ձեր կարիերայի համար։

Հեղինակ՝ Նազելի Բադալյան
Մարքեթինգի և հաղորդակցության բաժնի ղեկավար
staff.am