Հայաստանի լավագույն գրասենյակները․ CodeSignal-ի մեծ խոհանոցը, քնելու անկյունը, գրքերն ու խաղերը

3336

staff.am-ը մեկնարկել է հետաքրքիր նախագիծ՝ «Հայաստանի լավագույն գրասենյակները», որի նպատակն է ֆոտոպատմությունների տեսքով ներկայացնել Հայաստանում գործող ընկերությունների ամենատարբերվող, գեղեցիկ, հարմար, ոճային և տրամադրող գրասենյակները։

Նախագծի շրջանակում մենք այցելել ենք Երևանի սրտում՝ քաղաքապետարանի մոտակայքում գտնվող CodeSignal ընկերության գրասենյակ, որն այդ հասցեով 2022-ի սկզբից է տեղափոխվել։ Տեղափոխության պատճառը վերջին շրջանում ընկերության կողմից ներդրումներ գրավելու հետևանքով արագ աճող թիմի համար ավելի մեծ գրասենյակի անհրաժեշտությունն էր։

Ու թեև ընկերությունն առաջարկում է ճկուն աշխատանքային գրաֆիկ տնից աշխատելու հնարավորությամբ, Singalite-ները նախընտրում են գալ գրասենյակ և աշխատել այդտեղից, քանի որ, ինչպես նշում են, գրասենյակում իրենց շատ լավ են զգում։ 

CodeSignal-ում ազատությունը բոլոր հնարավոր ոլորտներում է։ Ընկերության աշխատակիցներն ունեն նույնիսկ հնարավորություն ընտրելու այն նախագիծը, որի վրա ցանկանում են աշխատել։

Գրասենյակն ընդհանուր open space-ի տրամաբանության մեջ է, բայց միաժամանակ արված են որոշակի բաժանումներ, որպեսզի տարբեր թիմերը հնարավորություն ունենան փոքր-ինչ առանձնացված աշխատելու։ Ընկերությունը կարևորում է իր աշխատակիցների՝ անձնական տարածք ունենալու հնարավորությունը, ուստի գրասենյակի դասավորվածությունը պլանավորելիս այնպես է արվել, որպեսզի գրեթե բոլոր աշխատակիցները մեջքով դեպի պատը նստեն, և համակարգչի էկրանը «հանրային» չլինի ու հիմնականում տեսանելի լինի միայն տվյալ աշխատակցի համար։

Իսկ կարևոր հանդիպումների, հարցազրույցների և առցանց զանգերի համար կան հատուկ առանձնացված փոքր կոնֆերանս սենյակներ, որոնց ձայնամեկուսացումը թույլ է տալիս առանձնանալ և ավելի հեշտ կենտրոնանալ։   

Կոնֆերանս սենյակները փոքր են, քանի որ ընկերությունը միջազգային է, և թիմակիցների մեծ մասը Հայաստանից դուրս է, ուստի հանդիպումները հիմնականում առցանց են տեղի ունենում։

Այդ սենյակների ներքին հարդարանքը կապույտի երանգների մեջ է, քանի որ դա ընկերության գույներից է։ Ավելի հեշտ տարբերակելու համար սենյակները կոչել են  ծրագրավորման լեզուների և դրանք ստեղծող ծրագրավորողների անուններով՝ Python (Գվիդո վան Ռոսում), C++ (Բյորն Ստրաուստրուպ), JavaScript (Բրենդան Այկ), Java (Ջեյմս Գոսլինգ)։ 

Գրասենյակի անկյուններից մեկում է տեղակայված հարմարավետ բազմոցը բազմաթիվ փափուկ խաղալիքներով, որին նստելուն պես, ինչպես վստահեցնում են Signalite-ները, նստողի աչքերը փակվում են։ Թիմակիցներից ոմանք պարբերաբար ննջում են այդ բազմոցին։ 

Գրասենյակն ունի ընդարձակ հանգստի հատված՝ կից խոհանոցով, որի մեծ սեղանի շուրջ Signalite-ները  պարբերաբար հավաքվում են, համեղ բաներ ուտում, զրուցում, պլանավորում իրենց առօրյան։ Այստեղ են նաև կանչում ընկերություն նոր ընդունված աշխատակիցներին՝ մինչև աշխատանքի անցնելը թիմի հետ անմիջական միջավայրում ծանոթանալու համար։

Հանգստի զոնայի փափուկ հատվածներում ընկերության թիմը պարբերաբար հավաքվում է և կազմակերպում կինոդիտումներ, խաղեր, երեկույթներ ու պարզապես հաճելի ժամանակ անցկացնում իրար հետ։ Ի դեպ, գրասենյակում սեղանի խաղերի սիրահարներ կան, որոնք պարբերաբար նոր խաղեր են բերում աշխատավայր։

Signalite-ները նաև պարբերաբար թեժ շախմատային մենամարտեր են ունենում՝ հանդիսատեսների մեծ բանակով։  

CodeSignal-ի մշակույթի կարևոր մաս է նաև ընթերցանությունը․ գրքերը երջանկացնում են ընկերության աշխատակիցներին, տալիս կարևոր տեղեկատվություն և հնարավորություն զարգանալու իրենց ոլորտում։ Ուստի ընկերությունը հոգում է, որպեսզի գրասենյակի գրապահարանը պարբերաբար լրացվի նոր գրքերով, իսկ թիմակիցները կարող են պատվիրել ցանկացած գրականություն՝ համատեղելով հաճելին և օգտակարը։

CodeSignal-ի թիմն արագ աճում է և համալրվում նոր աշխատակիցներով, որոնցից յուրաքանչյուրը մի նոր ու հետաքրքիր սովորություն է բերում ընկերություն՝ միաժամանակ դառնալով ընկերության մշակույթի կրող։ Իսկ դա նշանակում է, որ CodeSignal-ի գրասենյակի մասին հետաքրքիր պատմությունները միայն ավելանալու են։

Powered by staff.am.