Series C-ում $50մլն ներդրում ստացած հայկական CodeSignal ընկերությունն իր հիմնադրման ու գլոբալ թիմի մասին

2524

2015 թվականին հայ հիմնադիրների կողմից ստեղծված CodeSignal ստարթափն ընդամենը մի քանի օր առաջ հայտարարեց Series C՝ 50մլն. դոլլար ներդրման մասին՝ ավելի ու ավելի մոտենալով հայկական հաջորդ յունիքորնի տիտղոսին։ Այս նոր ներդրման շնորհիվ CodeSignal-ը գնահատվում է 500 մլն. դոլլար։ 

CodeSignal-ն աշխարհահռչակ մեծ ընկերությունների տրամադրում է տարբեր գործիքներ, որոնք օգնում են գնահատել աշխատանքի թեկնածուների գիտելիքներն ավտոմատ կերպով։

Հայաստանն աշխարհում հայտնի մի շարք ստարթափների տունն է ու սկզբնաղբյուրը, որի ակունքներով շարժվելով՝ այսօր staff.am թիմը թակեց CodeSignal ընկերության դուռը՝ բացահայտելու այն գերհզոր աշխատանքը, որն օգնում է մարդկանց աշխատանքի անցնել անկողմնակալ սկզբունքով։ Դե, ինչպես միշտ մեզ շատ ջերմ դիմավորեցին ու սկսեցինք մեր զրույցը CodeSignal ընկերության Տեխնիկական տնօրեն Էդուարդ Փիլիպոսյանի հետ։



Էդուարդ, կպատմե՞ք՝ ինչպես առաջացավ CodeSignal-ի ստեղծման գաղափարը։

CodeSignal-ի պատմությունը սկսվում է դեռևս դպրոցական տարիներին Սլոյան Տիգրանի և Արամ Շատախցյանի ինֆորմատիկայի և մաթեմատիկայի նկատմամբ մեծ հետաքրքրությունից։ Դպրոցական տարիներին երկուսն էլ շատ ակտիվ զբաղվել են մաթեմատիկայի և ինֆորմատիկայի օլիմպիադաներով, մասնավորապես, Արամը հաղթել է ինֆորմատիկայի առաջնությունը, իսկ Տիգրանը՝ մաթեմատիկայի։

Հետագայում երկուսն էլ մասնակցել են դպրոցականների միջազգային օլիմպիադաների և մաթեմատիկայից (IMO) Տիգրանն արժանացել է արծաթե մեդալի, իսկ ինֆորմատիկայից (IOI) Արամն է նույն հաջողությունը գրանցել։ Դրանից հետո իրենց ճանապարհները բաժանվել են, Տիգրանը գնացել է ԱՄՆ և սովորել Մասաչուսեթսի տեխնոլոգիական ինստիտուտում (MIT), իսկ Արամը շարունակել է ուսումը Երևանի պետական համալսարանում (ԵՊՀ)։ 

MIT-ն ավարտելու շնորհիվ Տիգրանի համար կարիերայի շատ հնարավորություններ են ստեղծվում, ստանում է աշխատանքի առաջարկներ Google-ից, Amazon-ից, Oracle-ից՝ այսպիսով աշխատանքի անցնելով Google-ում։ Մինչդեռ Արամը, չնայած իր ծրագրավորման հզոր գիտելիքների, Հայաստանում հանդիպում է դժվարությունների, քանի որ չուներ համապատասխան աշխատանքային փորձ, և նախընտրում է զբաղվել ֆրիլանս աշխատանքով։

Որոշ ժամանակ անց, 2014 – 2015 թվականներին Արամը և Տիգրանը կրկին հանդիպում են և զրույցի ընթացքում էլ առաջանում է այնպիսի պրոդուկտ ստեղծելու գաղափարը, որի շնորհիվ մարդիկ կկարողանան աշխատանքի ընդունվել ոչ թե իրենց CV-ի հիման վրա, այլ գիտելիքների։ Եվ այսպես, այդտեղից էլ սկիզբ առավ CodeSignal-ի պատմությունը՝ գիտելիքների ստուգման ավտոմատ համակարգը բերել ռեքրութմենթի ոլորտ, զարգացնել այն և օգնել մարդկանց գտնել աշխատանք գիտելիքի գնահատման հիման վրա։


Իսկ ինչպե՞ս է աշխատում այդ համակարգը և ո՞ր ընկերությունների կողմից է այն կիրառվում։

CodeSignal-ի գործիքներից և տեխնոլոգիական լուծումներից այսօր օգտվում են աշխարհահռչակ շատ ընկերություններ, ինչպիսիք են՝ Netflix, Facebook, Uber, Zoom, Robinhood և այլ շատուշատ ընկերություններ ԱՄՆ-ից, եվրոպական երկրներից և Հայաստանից։
Մասնավորապես, մենք տրամադրում ենք մի քանի գործիքներ. առաջինը ավտոմատ թեստային համակարգն է, երբ աշխատանքի դիմորդներն ի սկզբանե դիմելիս անցնում են թեստ 1 – 1,5 ժամ տևողությամբ՝ կախված գործատուի պահանջներից, որի արդյունքներն ավտոմատ կերպով գնահատվում են։ Այնուհետև գործատուները կարողանում են բավականին շատ տեղեկատվություն ունենալ թեկնածուի մասնագիտական հմտությունների վերաբերյալ և առաջին փուլում անգամ չդիտարկել CV-ն՝ բացառելով կողմնակալությունը։ Օրինակ, մենք նույնպես այդպես ենք անում և մեր բոլոր աշխատակիցների CV-ները միայն նայում ենք այնքանով, որ նույն քաղաքից կամ համապատասպան վայրից լինեն։ Առաջին փուլը հաղթահարելուց հետո արդեն դիտարկում ենք թեկնածուների CV-ները։

Իսկ երկրորդ գործիքը՝ օնլայն հարցազրույց անցկացնելու գործիքն է, որը տրամադրում է IDE, ինչի շնորհիվ գործատուն և թեկնածուն կարող են օնլայն տեխնիկական հարցազրույց անել, աշխատել նույն նախագծի վրա՝ սկսած փոքր ալգորիթմային խնդիրներից մինչև մեծ framework-եր և միաժամանակ գրել ծրագիր նույն հարթակում։

Հետաքրքիր է՝ ո՞ր քաղաքներում են գտնվում Ձեր գրասենյակները և CodeSignal-ի աճի ո՞ր բաղադրիչներն են ստեղծվում երևանյան թիմի կողմից։

CodeSignal-ի ստեղծման առաջին իսկ օրվանից Երևանում բացել ենք մեր գրասենյակը՝ միևնույն ժամանակ գրասենյակ բացելով նաև Սան Ֆրանցիսկոյում։ Այս պահին Սան Ֆրանցիսկոյում մեր հիմնական աշխատողները հեռահար աշխատանքային մոդելով են աշխատում, որի ջատագովն էինք դեռևս պանդեմիայից առաջ։ Երևանի մեր գրասենյակում մոտ 20 աշխատակից ունենք, և թիմն արագորեն մեծացնում ենք, սակայն այստեղ նույնպես խրախուսում ենք հեռահար մոդելը՝ մեզ մոտ աշխատելու հնարավորություն տրամադրելով Հայաստանի տարբեր քաղաքներից և աշխարհի այլ երկրներից։

Եվ պատահական չէ, որ CodeSignal-ի աճի գրեթե բոլոր բաղադրիչներում իր հատուկ ներգրավվածությունն ունի մեր երևանյան թիմը՝ սկսած ծրագրավորումից մինչև հաճախորդներին պրոդուկտի ներկայացումը, վաճառքը և շարունակական աջակցումը։

Շատ ողջունելի է նման ներգրավվածությունն ու դրան համապատասխան հաջողությունների շարքը։ Հավատացած ենք, որ տեխնոլոգիաների կիրառությունը նույնպես ընտրողաբար է իրականացվում։

Քանի որ մեր պրոդուկտն արդեն բավականին մեծ է, օգտագործում ենք տարբեր տեխնոլոգիաներ CodeSignal-ի մշակման համար։ Մեր տեխնոլոգիական stack-ը հիմնված է JavaScript-ի Meteor framework-ի, Frontend-ում React-ի, իսկ Backend-ում Node.JS-ի վրա, սակայն այդքանով չի սահմանափակվում։ Օգտագործում ենք նաև Docker, AWS-ի տարբեր տեխնոլոգիաներ, Mongo.DB, MySQL դատաբազաներ։ Մենք նաև ունենք այնպիսի մասնագետների պակաս, ովքեր կկարողանան ստեղծել թեստային խնդիրներ տարբեր ծրագրավորման լեզուներով։


Series A, B, իսկ այժմ արդեն C ներդրում։ Կպատմե՞ք ինչ հնարավորություններ այն կտրամադրի Ձեր թիմին։

Ընդամենը 10 ամիս առաջ էր, երբ մենք ստացանք Series B 25 մլն ներդրում՝ այդպիսով valuation-ը հասցնելով 120 միլիոնի, իսկ այժմ արդեն մեր նոր՝ 50 մլն ներդրմամբ բավականին հետաքրքիր ու լայն հնարավորություններ են բացվում մեր թիմի ու պրոդուկտի զարգացման համար։ Մասնավորապես, նախատեսում ենք մեծացնել մեր թիմը Երևանում, ԱՄՆ-ում, Եվրոպայում, կատարելագործել մեր գործիքները՝ ավելացնել ավելի շատ լեզուների, տեխնոլոգիաների վերաբերյալ խնդիրներ մեր համակարգում։ Ինչպես նաև, քանի որ այս ոլորտն անընդհատ զարգացման կարիք ունի, պլանավորում ենք նոր տեսակի գիտելիքների ստուգման համար կատարել համապատասխան հետազոտություններ։

Եվ մեր զրույցը ամփոփենք մյուս ստարթափերներին ուղղված խորհրդով. Ելնելով Ձեր հարուստ փորձից՝ կառանձնացնե՞ք երեք խորհուրդ տեխնոլոգիական թիմը ղեկավարելու և ստարթափի զարգացումը հաջողելու համար։

Իմ առաջին խորհուրդն է ստեղծել ուժեղ թիմ, ուշադրություն դարձնել թիմ կազմելու պրոցեսին, հարցազրույցներին, քանզի ուժեղ թիմն այն հիմքն է, որի վրա կառուցվում է ընկերությունը, երկրորդը՝ անընդհատ աշխատել այդ թիմի զարգացման վրա, ղեկավարը պետք է միշտ աշխատի իր թիմի մասնագիտական աճի ուղղությամբ, որպեսզի թիմակիցները զարգացնեն իրենց տեխնիկական գիտելիքները և պրոֆեսիոնալ հմտությունները, և երրորդը՝ անընդհատ զբաղվել թիմի մոտիվացիայով, որպեսզի թիմը կատարի հետաքրքիր ու չելինջինգ աշխատանք ու միշտ լինի մոտիվացված։

Բացահայտեցինք հայկական ևս մեկ հաջողված ստարթափի՝ CodeSignal-ի հաղթարշավի պատմությունը, բայց ոչ ամբողջությամբ, քանի որ նոր հաղթանակները դեռևս առջևում են։ Ուստի անպայման հետևենք ընկերության էջին staff.am-ում որևէ նորույթ բաց չթողնելու համար, ինչպես նաև կարող եք հետևել նոր աշխատատեղերին ու մասը դառնալ այս հաջողության։