Տարվա սկզբին Պետական եկամուտների կոմիտեն (ՊԵԿ) հայտարարեց ՀՀ մաքսային ծառայության նոր բարեփոխումների փուլի մասին, որի շրջանակում անցկացնելու էր մաքսային ծառայողի պատրաստման դասընթացներ։ Նախադեպը չունեցող դասընթացները պետք է լավ հնարավորություն դառնային թե՛ արդեն իսկ ՊԵԿ աշխատակիցների համար, թե՛ այլ ոլորտների մասնագետների համար՝ վերապրոֆիլավորվելու, նոր գիտելիքներ ձեռք բերելու և դառնալու նոր սերնդի մաքսային ծառայող։
Քանի որ աշխատանքն աննահադեպ էր և շատ ծավալուն, ՊԵԿ-ը դիմեց staff.am-ին, որպեսզի վերջինս ստանձնի դիմորդների հավաքագրման բարդ ու պատասխանատու պարտականությունը։
Այժմ, երբ աշխատանքն արդեն ավարտված է, դիմորդները՝ ընտրված, իսկ ՊԵԿ-ը շուտով կունենա նոր մաքսային ծառայողներ, staff.am-ը պատմում է դիմորդների հավաքագրման գործում ՊԵԿ-ի հետ հաջողված համագործակցության մասին և ամփոփում է կատարված աշխատանքի արդյունքները։
«Այսօր Մաքսային մարմիններում իրականացվում են լրջագույն բարեփոխումներ, որոնցից մեկը նոր աշխատակիցների ընդգրկումն է։ Բայց այսօր մեր ընդունելության ընթացակարգերը կիսով չափ թղթային տարբերակով են իրականացվում, և հենց այստեղ է, որ մենք դիմեցինք staff.am-ի օգնությանը։ staff.am-ի օգնությամբ մենք հնարավորություն ենք ունեցել էլեկտրոնային տարբերակով ընդունել, ուսումնասիրել և ընթացք տալ 2000-ից ավելի դիմումներին։ Դա մեզ հնարավորություն տվեց չծախսել այն ժամանակը, որը պիտի ծախսեինք և մի քանի ամիս շարունակ թղթային տարբերակով փորձեինք այս ամենի տակից պատվով դուրս գալ, և staff.am-ի օգնությամբ իրականացնել ամեն ինչ շատ կարճ ժամկետում և շատ որակով», – ամփոփելով staff.am-ի հետ համատեղ իրականացված աշխատանքը՝ նշում է ՊԵԿ նախագահի տեղակալ Շուշանիկ Ներսիսյանը։
«Մաքսային ծառայողի պատրաստման դասընթացը staff.am-ի համար բավականին մասշտաբային նախագիծ էր։ Ծրագրի մասշտաբայնությունը նրանում էր, որ staff.am-ի գրեթե բոլոր գործիքները և հարթակի հնարավորությունները կիրառության դրվեցին։ Ի սկբզանե ՊԵԿ-ը staff.am-ի առջև երկու խնդիր էր դրել։ Առաջինը թվային հարթակների, այդ թվում՝ staff.am-ի միջոցով թիրախային լսարանի իրազեկումն էր, իսկ երկրորդը՝ դիմորդների և դիմումների կառավարման ծրագրային ապահովման տրամադրումը, որը կօգներ Պետական եկամուտների կոմիտեին առավել օպտիմալ կազմակերպել ամբողջական գործընթացը», – պատմում է staff.am-ի համահիմնադիր Լուիզա Ավետիսյանը։
Դիմումների հավաքագրման և լավագույն արդյունքին հասնելու համար staff.am-ն օգտագործել է հետևյալ գործիքները․ staff.am հարթակում աշխատանքի հայտարարության տեղադրում, կայքում և բջջային հավելվածում գովազդային բաններների տեղադրում և StaffMedia հարթակի միջոցով ամփոփ հոդվածի տեղադրում, որը մանրամանս պատմում է մաքսային ծառայողի պատրաստման դասընթացի մասին։ Անհրաժեշտ տեղեկատվության առաջխաղացում է կազմակերպվել նաև սոց․մեդիա հարթակներով։
Իրազեկման աշխատանքներն իրականացվել են ՊԵԿ տեղեկատվության և հասարակայնության հետ կապերի բաժնի հետ համատեղ, որը պատրաստել և տրամադրել էր տեղեկատվական հոլովակները, ինչպես նաև՝ մանրակրկիտ նկարագրել դասընթացներին դիմումներ ներկայացնելու կարգը։ Տրամադրվել է նաև մաքսային ծառայողի պատրաստման դասընթացի տարբեր փուլերի մասին պատմող տեղեկատվությունը։
«Մեր մարտահրավերներից մեկը եղել է հնարավորինս լայն իրազեկումը և որակյալ կադրերի ներգրավումը։ Եվ ես կարծում եմ, որ այս ուղղությամբ մենք հաջողություն ենք գրանցել, որովհետև 2000-ից ավելի դիմորդ ենք ունեցել, որոնցից 700 հոգին հաղթահարել է բոլոր փուլերն ու հասել է հարցազրույցի փուլին», – հավելում է Շուշանիկ Ներսիսյանը։
Դիմումների հավաքագրման գործընթացը 4 շաբաթ է տևել, որից հետո արդեն իսկ ձևավորված մեծ բազան staff.am-ը փոխանցել է ՊԵԿ աշխատակիցներին, որոնք էլ շարունակել են աշխատանքները staff.am-ի կողմից տրամադրած ծրագրային ապահովման միջոցով։
«Վերջնական արդյուքները կրկնակի գերազանցեցին մեր սպասելիքները», – ընդգծում է Լուիզա Ավետիսյանը։
