«Վերափոխելով բանականությունը» խորագրով «Գլոբալ ինովացիոն ֆորում»-ի ընթացքում աշխարհի 20 երկրների ավելի քան 90 գիտնականներ, նորարարության և բիզնես ոլորտի ներկայացուցիչներ քննարկում են արհեստական բանականության դրսևորումները տարբեր ոլորտներում։ StaffBlog-ը՝ որպես կարիերայի մեդիա գործընկեր, ձեզ հետ կկիսվի կարիերայում AI-ի ունեցած ազդեցության մասին՝ հարցազրույց ունենալով ակնառու հյուրերի, ներկաների և տարբեր ոլորտի գիտնականների հետ։
Այս թեմայով անչափ հետաքրքիր էր զրուցել Մեծ Բրիտանիայից DeepMind-ի հետազոտող-գիտնական Իրինա Հագգինսի հետ։
Ի՞նչ խորհուրդ կտաք այն երիտասարդներին, ովքեր հետաքրքրված են իրենց կարիերան շարունակել գիտության որևէ ճյուղում, այսինքն դառնալ գիտնական։
Միանշանակ կասեմ գնացեք առաջ:
Այն շատ հետաքրքիր կարիերայի ուղի է, թերևս ամենահետաքրքիրը, քանզի այս ոլորտում չկա որևէ իրար նման օր և անընդհատ նոր բացահայտումներ եք անում: Դուք եք կառավարում ձեր աշխատանքային ժամերը: Ինձ համար այն կատարյալ աշխատանք է:
Մոդեռնիզացված գիտություններին կհաջորդեն մոդեռնիզացված մասնագիտությունները. թվարկեք մի քանի մասնագիտություններ, որոնք կառաջանան այս փոխակերպումների արդյունքում։
Կարծում եմ AI-ի շնորհիվ շատ աշխատանքներ կավտոմատացվեն: Մարդկանցից կպահանջվի միայն ծրագրավորել և ուսուցանել AI հմտությունները: Ապագայում շատ կարևոր կլինեն հմտությունները, ինչպիսիք են կոդավորումը, մեքենայական ուսուցումը, վիճակագրությունը և մաթեմատիկան:
Իսկ ինչ փոփոխություններ պետք է կատարենք մեր կարիերայում ժամանակին համընթաց քայլելու համար։
Կարծում եմ, նախ, անհրաժեշտ է փոխել մեր տեսլականը: Նախկինում մենք կարծում էինք, որ անհրաժեշտ է սովորել և անցնել աշխատանքի, ավել ոչինչ: Իսկ այժմ շատ կարևոր է պարբերաբար ադապտացվել փոփոխություններին: Օրինակ, աշխատել 5 տարի որևէ մի տեղ, այնուհետև օնլայն աղբյուրների միջոցով սովորել նոր բան և փոքր-ինչ փոխել կարիերայի ուղին: Կյանքը փոխվել է, տեխնոլոգիաները փոխվել են և անհրաժեշտ է հասցնել այս ամենի հետևից և չնահանջել:
Զրուցեց Նազելի Բադալյանը
