Ուղեցույց. Ինչպե՞ս առավելագույն արդյունք ստանալ staff.am-ում տեղադրված աշխատանքի հայտարարություններից

Ավելի քան հինգ տարի լինելով ՀՀ աշխատաշուկայի ակտիվ մասնակից և աշխատելով ավելի քան 3000 գործատու ընկերության հետ՝ մեր թիմը կուտակել է բավականին մեծ փորձ, թե ինչպես գրավել լավագույն մասնագետների ուշադրությունը և ստանալ առավելագույն արդյունք staff.am հարթակից։ Այս խորհուրդները մեր գործատու ընկերությունների համար են և միտված են օգնելու ապահովել ցանկալի արդյունքը։

1. Գործատուի նույնականացում staff.am-ի կողմից

Առաջին և կարևոր քայլը գործատուի նույնականացումն է՝ որպես գործատու վստահելի ներկայացվածություն ունենալու համար։

Որո՞նք են staff.am-ում նույնականացում ստանալու չափանիշները՝

1. Ընկերության իրավաբանական անձը նույնականացված է,

2. Գործատուն ունի ներկայացվածություն թվային հարթակներում,

3. Գործատուն ունի պատշաճ լրացված կարիերայի էջ staff.am-ում։

2. Գրավիչ կարիերայի էջը գործի կեսն է

staff.am-ում դուք ունեք ձեր ընկերության կարիերայի էջը, որը մեր կողմից տրամադրվող անվճար, բայց շատ կարևոր գործիքներից է։ Գրագետ լրացված կարիերայի էջը ոչ միայն տեղեկացնում է դիմորդին գործատուի, վերջինիս կողմից տրամադրվող benefit-ների, կորպորատիվ մշակույթի և շատ ավելիի մասին, այլ նաև խրախուսում է հետևել (follow) ընկերությանն ու ստանալ ծանուցումներ ընկերության հաստիքային թարմացումների վերաբերյալ։

Այս ամենը՝ թվերով․

Ինչպես նաև մենք ունենք շարք՝ «7 կարիերայի էջ staff.am-ում, որոնք չի կարելի բաց թողնել», որտեղ անդրադառնում ենք հետաքրքիր կարիերայի էջերին և հավելյալ առաջխաղացնում դրանք (FB, IG, LN, Telegram), զուգահեռ ունենում ենք գովազդ՝ «Հետևեք ՀՀ ամենաակտիվ գործատուների կարիերայի էջերին», որտեղ ներառվում է 10 ընկերություն։

Ի դեպ, եթե ժամանակ չունեք լրացնելու ձեր կարիերայի էջը, ապա կարող եք վստահել այն մեզ։ Մենք ունենք հատուկ ծառայություն, որը լիարժեք կփակի ձեր կարիքները և կօգնի ձեզ լավագույնս ներկայանալ աշխատաշուկայում։

3․ Չափից ավելի երկար ու խրթին հայտարարություններ

Առավել արդյունավետ է աշխատանքի հայտարարությունները ձևակերպել հնարավորինս հակիրճ և բովանդակալից՝ ներկայացնելով առանցքային կետերը։ Հասկանալի է, որ որոշ հաստիքների համար կարևոր է ներկայացնել հնարավորինս շատ մանրամասներ, օրինակ՝ օրենքի կամ կազմակերպության ներքին ընթացակարգերի տեսանկյունից։ Սակայն մնացած բոլոր դեպքերում խուսափեք հաստիքի նկարագրությունը ծանրաբեռնելուց։

4. Հաստիքի ճիշտ ընտրված կատեգորիան կմեծացնի դրա տեսանելիությունը

staff.am-ում աշխատանքի հայտարարությունը տեղադրելիս դուք ընտրում եք ոչ թե ընկերության կատեգորիան, այլ՝ հաստիքի։

Մեր հարթակում աշխատանք փնտրելիս թեկնածուները սովորաբար իրականացնում են ֆիլտրված որոնում՝ ընտրելով աշխատանքի կատեգորիան (ավելացնելով նաև այլ ֆիլտրեր), ինչպես նաև բաժանորդագրվում են աշխատանքի կատեգորիաներին ու ստանում ծանուցումներ։ Հետևաբար, եթե դուք, օրինակ, փնտրում եք վաճառքի մասնագետի, իսկ աշխատանքի կատեգորիան նշել եք, օրինակ, իրավական, ապա վաճառքի ոլորտում աշխատանք փնտրող թեկնածուները դժվար թե այն տեսնեն։

Բացի այդ, հաստիքների համար առաջխաղացում իրականացվում է նաև staff.am -ի սոց․ մեդիաներում՝ շաբաթական 6 օր, մեկական կատեգորիայով, ինչպես նաև հաստիքը տեղադրելուն պես ավտոմատ կերպով հայտնվում է նաև մեր մասնագիտացված Telegram ալիքներում, որոնց ևս թեկնածուները բաժանորդագրվում են։

5. Հայտարարության մեջ մասնագիտական հմտությունները (hard skills) առանձին նշելը կմեծացնի հասանելիությունը թիրախային լսարանին

staff.am-ում աշխատանքի հայտարարություն տեղադրելիս կարող եք նշել ինչպես մասնագիտական (hard skills), այնպես էլ անձնային հմտություններ (soft skills), որոնք կարևոր են տվյալ հաստիքի համար։ Դա ոչ միայն հնարավորություն է տալիս հավելյալ տեղեկատվություն տալ թեկնածուին աշխատանքի մասին, այլև մասնագիտական հմտությունները ծառայում են որպես բանալի բառեր որոնում իրականացնելիս։ Ինչպես նաև հավելյալ առաջխաղացում ենք կազմակերպում սոցիալական մեդիայում, օրինակ՝  «պահանջված է աշխատաշուկայում խորագրով»:

6. Հաստիքի նկարագրության մեջ աշխատավարձի չափը նշելով կխնայեք և՛ ձեր, և՛ թեկնածուի ժամանակը

7. «Սիմո՛ն, տար, Սիմո՛ն, բեր» հաստիքներից լավ արդյունքներ մի ակնկալեք

Աշխատանքային հայտարարությունները, որտեղ փնտրում են մարքեթինգի և մարդկային ռեսուրսների մասնագետի, օֆիս մենեջերի և միաժամանակ SMM մասնագետի, սովորաբար ակնհայտ պատճառներով ունենում են շատ քիչ դիմումներ, կամ բացարձակ չեն ունենում։

Իսկ դիմորդներն էլ չեն ունենում գիտելիքների և փորձի ցանկալի մակարդակ։

8. Փնտրում եք մասնագետների, որոնք կամ չկան մեր տարածաշրջանում, կամ շատ քիչ են

Իհարկե, կան հաստիքներ, որոնք իսկապես մարտահրավեր են, քանի որ մեր տարածաշրջանում նման մասնագետներ չկան կամ շատ քիչ են։ Այս դեպքում հարց է առաջանում՝ ինչպե՞ս թիրախավորել հենց նրանց։

staff.am-ում ունենք 110,000-ից ավելի գրանցված մասնագետ, ովքեր ակտիվ փնտրում են աշխատանք կամ ունեն, բայց դեմ չէին լինի ստանալ նոր առաջարկ։ Դիմորդների բազան անվճար հասանելի է մեր գործընկեր կազմակերպություններին, հետևաբար կարող եք որոնել ձեր ցանկացած թեկնածուին և հրավիրել, որ դիմի ձեր աշխատանքին։

9. Ոչ պրոֆեսիոնալ էլ․ հասցեն վատ է ազդում ընկերության գործատուի բրենդի վրա

Աշխատանքային հայտարարություններում կարևոր է ներառել պրոֆեսիոնալ էլ․ հասցե, օրինակ՝ jobs@company.am, careers@company.com կամ name@company.am… և խուսափել name.surname.1993@gmail.com, name.smth.12345@mail.ru․․․, քանի որ դրանք բացարձակ գրավիչ չեն թեկնածուների համար։

10. Կետադրական և քերականական սխալները գործատուի նկատմամբ վստահություն չեն ներշնչում

Աշխատանքային հայտարարությունները ևս ձևավորում են ընկերության իմիջը, հետևաբար այն հայտարարությունները, որտեղ առկա են քերականական և կետադրական սխալներ, վրիպակներ ակնհայտորեն բացասաբար են ազդում դիմումների քանակի վրա։
Հարկ է նշել նաև, որ հայտարարությունը կազմելիս պետք է խուսափել այն սխալ ձևավորելուց, օրինակ` չափից մեծ ֆոնտեր կամ տարատեսակ գույներ։

11. Կարևոր է հետևել ՀՀ Աշխատանքային օրենսգրքով արգելված սահմանափակումներին

Տարիքով, սեռով, ազգությամբ, կրոնով, քաղաքական դիրքորոշմամբ պայմանավորված սահմանափակումներն արգելված են ոչ միայն ըստ Աշխատանքային օրենսգրքի, այլև չեն ընդունվում staff.am-ում։
Հաշվի առեք, որ նման դեպքերում օրենքի խախտումը նաև բացասաբար է անդրադառնում գործատուի բրենդի վրա՝ հաճախ առիթ դառնալով հասարակական քննարկումների։

Դե ինչ, հուսանք, որ ներկայացված ուղեցույցն ու խորհուրդները կօգնեն ձեր ընկերությունում հավաքագրման գործընթացն էլ ավելի արդյունավետ դարձնել։ Իսկ մեր թիմն ինչպես միշտ պատրաստակամ է օգնել, տրամադրել խորհրդակցություն և միասին հասնել լավագույն արդյունքի։