Hexact ընկերությունն իր աշխատանքի 3-րդ տարին նշանավորեց նոր ռազմավարությամբ, որի հիմքում ընկած է big data-ն և արհեստական բանականությունը (AI) բոլորին հասանելի դարձնելու տեսլականը։
Hexact-ն ունի 40,000-ից ավելի օգտատեր, և այսօրվանից բոլորին արդեն հասանելի է ամպային տեխնոլոգիայով աշխատող վաղվա աշխարհը։ Google BigQuery-ն վերլուծությունների համար օգտագործվող տվյալների խոշորագույն բազան է աշխարհում։ Google Cloud-ի տվյալների ամպային մեծամասշտաբ այս պահեստից այսուհետև կարելի է օգտվել Hexact-ի էկոհամակարգի գլխավոր՝ Hexomatic պրոդուկտի միջոցով, և ինչն ամենակարևորն է՝ առանց ծրագրավորման որևէ գիտելիքի:
Իր 3-ամյա գործունեությունը և նորարարությունը ներկայացնող միջոցառման ընթացքում ընկերության հիմնադիր տնօրեն Ստեփան Ասլանյանը «բացեց փակագծերը»։
«Big data-ն և արհեստական բանականությունը մենք դարձնում ենք համընդհանուր հասանելի, ինչի շնորհիվ «սովորական» մարդը կարիք չի ունենալու ծրագրավորում իմանալու՝ ամպային տեխնոլոգիաներից օգտվելու, բարդ ավտոմատացումներ ու գործողություններ կատարելու համար», – ասաց Ստեփան Ասլանյանը։
Նրա խոսքով՝ Hexact-ն ստեղծում է օպերացիոն համակարգ՝ հետագա տարիներին գործն ու առօրյան ավելի հեշտացնելու համար։
Ստարտափի գլխավոր պրոդուկտը՝ Hexomatic-ը վերածվում է պրոդուկտների «առուվաճառքի» հարթակի (marketplace), որտեղ Hexact-ի պրոդուկտներից բացի կլինեն այլ ստարտափների գործիքներ։ Այսուհետև ցանկացած ստարտափ կամ մասնագետ կարող է իր ավտոմատացման (API) գործիքներն ինտեգրել Hexomatic-ում, վաճառել, եկամուտ ստանալ, զարգացնել բիզնեսը։
Ընկերության բիզնեսի զարգացման տնօրեն Արմեն Ավագ Ավագյանի խոսքով՝ Hexact-ի նորարարությունը կայանում է նրանում, որ ընկերությունը ստեղծել է համացանցի տվյալների բազայի և սովորական օգտատիրոջ միջև միջնորդ համակարգ, որը հնարավորություն է տալիս անգամ ՏՏ մասնագետ չհանդիսացող և տեխնոլոգիապես ոչ զարգացած օգտատերերին մի քանի հպումով հասանելիություն ունենալ big data-ին։
«Ցանկացած մարդ՝ լրագրող, բժիշկ, ոստիկան, կարող է օգտվել այդ հնարավորությունից առանց հատուկ հմտություններ ունենալու», – նշեց Ավագյանը։
«Մեր օգտատերերի մեծ մասն ԱՄՆ-ից է և այլ անգլալեզու երկրներից՝ Կանադայից, Եվրոպայի երկրներից, մենք օգտատերեր ունենք նաև Ասիայում և Հայաստանում նույնպես։ Ցավոք, հայկական շուկան ավելի փոքր է, բայց մենք միայն ուրախ կլինենք ընդլայնել մեր ներկայությունն այստեղ», – իր հերթին հավելեց Hexact-ի մարքեթինգի տնօրեն Քրիս Քլոզեթը։
Hexact-ը 2021-ը եզրափակեց 400% աճով, նոր կատարելագործված պրոդուկտով ու աշխարհի 160 երկրում գտնվող 40,000-ից ավելի օգտատերերով։ Այժմ ընկերությունում աշխատում է 40 մասնագետ, սակայն մինչև տարեվերջ ստարտափը նախատեսում է թիմը հասցնել 100-ի։
«Hexact»-ի էկոհամակարգը 3 հիմնական պրոդուկտից է բաղկացած. Hexomatic-ն աշխատանքի ավտոմատացման հարթակ է, որը հնարավորություն է տալիս օգտագործել համացանցը որպես տվյալների սեփական աղբյուր, առանց ծրագրավորման գիտելիքների օգտագործել արհեստական բանականության ամենաբարդ ծառայությունները` կրկնվող ու ժամանակատար առաջադրանքներն ավտոմատացնելու համար: Hexowatch-ը մոնիտորինգի է ենթարկում ցանկացած կայքի տեսողական, բովանդակային, տեխնոլոգիական, հասանելիության, կոդի կամ գների առցանց փոփոխությունները և ծանուցում այդ մասին: Hexometer-ը 24/7 իրականացնում է կայքերի մոնիտորինգ և օգնում բարելավել դրանց աշխատանքը։
