Ինչպե՞ս կազմել գրագետ և պրոֆեսիոնալ CV

1416

Ժամանակակից աշխարհում գրեթե չկա մի մարդ, ում համակարգչում մի տեղ պահպանված չլինի CV անվանմամբ որևէ ֆայլ։

CV-ն (Curriculum Vitae), նույն ինքը՝ ինքնակենսագրականը, փաստացի մեր այցեքարտն է աշխատաշուկայում, որի օգնությամբ պոտենցիալ գործատուն կարող է ծանոթանալ մեր մասնագիտական կենսագրությանը՝ սկսած փորձից, գիտելիքներից ու կրթական հենքից՝ վերջացրած անձնային որակներով («սոֆթ» հմտություններ)։

Գրագետ և պրոֆեսիոնալ CV կազմելը պահանջում է երկարատև պատրաստվածություն։ Ավելի լավ Է ժամանակ հատկացնել ուսումնասիրելու, թե ինչպես է պետք կազմել ճիշտ CV, քան ոչ պրոֆեսիոնալ CV-ն ուղարկել գործատուներին՝ ունենալով ժամանակի կրկնակի վատնում։ 

Առաջարկում ենք կազմել գրագետ և պրոֆեսիոնալ CV`ծանոթանալով մի քանի պրակտիկ քայլերի, որպեսզի վստահությամբ թակեք կարիերայի դռները։
Այն հատկապես կարևոր է սկսնակ մասնագետների համար, որոնք CV-ն դեռ պետք է կազմեն 0-ից: Այս հոդվածն ակտուալ է նաև այն վաղուց չթարմացրածների համար, որոնք տարիներ շարունակ աշխատում են որևէ կազմակերպությունում և երկար դադարից հետո պետք է կրկին թարմացնեն իրենց այցեքարտը։

Քայլ 1․ Գրագետ CV-ն սկսում է գրագետ կառուցվածքից

Ձեր CV-ն հավաքագրման մասնագետի համար նախ պետք է լինի վիզուալ առումով հեշտ ընկալելի և բավարար հագեցած, քանի որ միջինում հավաքագրման մասնագետը ծախսում է 5-10 վայրկյան՝ դրա մասին առաջին տպավորություն ստեղծելու վրա։

CV-ի կառուցվածքը պետք է լինի հետևյալ հաջորդականությամբ․

1․ Վերնագիր, 

2․ CV-ի նպատակ կամ ամփոփում,

3․ Մասնագիտական փորձ,

4․ Կրթություն,

5․ Հմտություններ, 

6․ Հոբբիներ:

Քայլ 2․ CV-ում նշել կոնտակտային տվյալներ

Կոնտակտային տվյալների մասին տեղեկատվությունը, սովորաբար, նշվում է CV-ի վերնագրի հատվածում, սակայն որոշ թեկնածուներ նախընտրում են տեղադրել այն CV-ի ստորին հատվածում։ Երկու տարբերակներն էլ ընդունելի են։

CV-ի վերնագրում նշեք ձեր անունն ու ազգանունը՝ հետագայում անճշտությունների առաջ չկանգնելու համար։ 

Խուսափեք այս բաժնում այլ անձնական տվյալներ նշելուց, ինչպես, օրինակ, ծննդյան օրը, ամիսը, ամսաթիվը կամ տարիքը, բնակության հասցեն, ամուսնական կարգավիճակը, երեխաների առկայությունը, կուսակցության անդամագրումը, կրոնը և այլ ոչ տեղին տվյալներ։ 

Էլ. հասցե և հեռախոսահամար

Պատկերացրեք, օրինակ, գործատուն կամ ՄՌԿ մասնագետը դուք եք և ստանում եք նամակներ հետևյալ տարբեր էլ․ հասցեներից 1․king777@yandex.ru և 2․ name.surname@gmail.com: Ըստ ձեզ՝ այս երկու տարբերակներից ո՞րն է պրոֆեսիոնալության տեսանկյունից ընդունելի։ Դե, իհարկե, երկրորդը։ 

Ցանկալի է նաև ունենալ Google օգտանուն (Gmail էլեկտրոնային փոստի հասցե), որը մշտապես հասանելի է գրեթե բոլոր գերատեսչական և մասնավոր կազմակերպություններին՝ ի տարբերություն, օրինակ, mail.ru կամ rambler․ru էլ. փոստի հասցեների, որոնք այսօր ունեն հասանելիության սահմանափակում։

Ինչ վերաբերում է հեռախոսահամարին, խուսափեք նշել ֆիքսված տան հեռախոսահամարը, CV-ում տեղադրեք միայն ձեր ակտիվ գործող բջջային հեռախոսահամարը:

Խուսափեք այն էլ․ հասցեներից կամ հեռախոսահամարներից, որոնք հաճախ չեք օգտագործում։ Խորհուրդ է տրվում նաև մի քանի անգամ ստուգել՝ համոզվելու համար, որ ճիշտ եք գրել դրանք։ 

Ինչպե՞ս կազմել գրագետ և պրոֆեսիոնալ CV

Քայլ 3․ Կողմնորոշվել լուսանկարի հարցում

Առաջին հերթին հարց է առաջանում, թե արդյոք պարտադիր է ունենալ լուսանկար CV-ում։ Այս հարցի շուրջ կան շատ տարբեր մոտեցումներ՝ կախված այն երկրից, որում գործում է ընկերությունը և ձեր մասնագիտական ոլորտից։

Թե որքանով է անհրաժեշտ լուսանկարի կցումը, կախված է մի շարք հանգամանքներից:

Օրինակ, Եվրոպական շատ երկրների, ինչպես նաև ԱՄՆ աշխատաշուկայում առավել ընդունված է CV-ում չներառել լուսանկար, մինչդեռ Ավստրալիայում և Նոր Զելանդիայում վերջերս տարածված միտում կա CV-ն համեմելու պրոֆեսիոնալ լուսանկարով, որը, սակայն, գործատուի պահանջը չէ և թողնված է թեկնածուի հայեցողությանը։

Լուսանկար տեղադրելուն առավել հակված են Միջին Արևելքի և Ասիայի երկրների աշխատաշուկաները (հատկապես՝ Դուբայում և Սաուդյան Արաբիայում)։

Հայաստանում այս հարցի շուրջ միասնական մոտեցում չկա, գրեթե 50/50 հարաբերակցությամբ մասնագետների կարելի է հանդիպել, որոնք ընդունում են կամ չեն ընդունում CV-ում լուսանկար ունենալը։

Եթե, այնուամենայնիվ, որոշել եք կցել լուսանկար, անդարադառնանք դրա «կարելիներին» ու «չի կարելիներին»։

ԿԱՐԵԼԻ է․․․

✅ Լուսանկարում մենակ եք,

✅ Դիմանկար, երևում են գլուխն ու որոշ չափով ուսերը,

✅ Լավ լուսավորությամբ որակյալ լուսանկար,

✅ Business casual ոճի հագուստ։

Ինչպես կազմել CV
Ինչպես կազմել CV

Չի կարելի․․․

❌ Խմբակային լուսանկար,

❌ Նորաձև դիրքերով ամբողջական լուսանկար,

❌ Սելֆի,

❌ ֆիլտրերի կիրառում,

❌ Երեկոյան դիմահարդարումով և տոնական հագուստով լուսանկար,

❌ Անհամապատասխան աքսեսուարների կիրառում՝ արևային ակնոց, գլխարկ, շատ մեծ և ուշադրություն գրավող զարդեր,

❌ Մեծ չափի կամ շատ փոքր լուսանկարներ։

Քայլ 4․ Ճիշտ հաջորդականությամբ ներկայացնել աշխատանքային փորձն ու մասնագիտական ուղին

Ժամանակակից գործատուին առաջնահերթ հետաքրքրում է, թե թափուր հաստիքին համապատասխան ինչ աշխատանքային փորձ ունեք։
CV-ում աշխատանքային փորձը նշվում է հետևյալ հաջորդականությամբ՝ սկսած ներկա կամ ամենավերջին աշխատանքից, եթե այս պահին չեք աշխատում։

Աշխատանքային փորձին անդրադառնալիս եղեք հստակ․ նշեք ինչպես ընկերությունը (ընդ որում կիրառեք բրենդային, ոչ թե իրավանաբանական անվանումները) և ձեր զբաղեցրած հաստիքի անվանումը, այնպես էլ ժամանակահատվածը, որի ընթացքում զբաղեցրել եք այն։

Եթե երբևէ հանրային կամ կամավորական աշխատանք եք կատարել, որն առնչվում է տվյալ հաստիքի համար պահանջվող հմտություններին, դրանք ևս կարող եք ներառել այս հատվածում։

Քայլ 5․ Նշել կրթության մասով միայն ամենառելեվանտ տեղեկատվությունը

Կրթությունը ևս ձեր այցեքարտի կարևորագույն բաղադրիչներից է։ Հետևաբար, աշխատանքային փորձին անմիջապես հաջորդում է ուսման վերաբերյալ տեղեկատվությունը։ 

CV-ի այս հատվածում ներառեք տվյալ հաստիքին վերաբերող ուսումնական հաջողությունների մասին տեղեկատվությունը։ 

Եթե ուզում եք տեղադրել ինֆորմացիա կարևոր վկայականների կամ լիցենզիաների մասին, անուններից բացի տեղադրեք նաև հղումներ, որոնք կտանեն դեպի վկայականի թվային տարբերակ։

Կրթության մասին խոսելիս խուսափեք նշել դպրոցական տարիների մասին։ Սկսեք անմիջապես ներկայացնել մասնագիտական կրթությունը՝ բուհ, քոլեջ, ուսումնարան և այլն։ 
Ցանկալի է, որ բացի ֆորմալ կրթությունից նշեք նաև ոչ ֆորմալ կրթությունը ևս։ Իհարկե, ցանկալի չէ թվարկել բոլոր վեբինարները, թրեյնինգները։ Նշեք վերապատրաստման այն դասընթացների մասին, որոնք երկարատև են եղել և առնչվում են ձեր մասնագիտական (hard) կամ անձնային (soft) հմտություններին։

Կրթության հատվածում հիշեք, որ CV-ն չափից ավելի շատ թրեյնինգներով և կրթական հաստատություններով ծանրաբեռնելը ձեզ լավագույնս չի ներկայացնում։

Այստեղ կարևոր է ներկայանալ միայն կրթական ամենակարևոր ձեռքբերումներով։

Ինչպես կազմել CV

Քայլ 6․ Նշել տվյալ հաստիքին համապատասպան սոֆթ և մասնագիտական հմտությունները

CV-ի «Հմտություններ» բաժնում կարևոր է ներառել ինչպես անձնային (սոֆթ), այնպես էլ մասնագիտական հմտությունները, որոնք հարկ է համապատասխանեցնել թափուր հաստիքի պահանջներին։

Այս բաժնում ներառեք նաև լեզուները, որոնց տիրապետում եք և յուրաքանչյուրի իմացության մակարդակը՝ առաջնորդվելով ոչ թե ինտուիտիվ գնահատականով, այլ փաստերով։ 

Ցանկալի չէ այս հատվածում նշել, որ, օրինակ, վարժ տիրապետում եք Word-ին կամ Google Chrome-ին, քանի որ ժամանակակից աշխարհում սա ընկալվում է նույն կերպ, ինչ տիրապետում եք այբուբենին։

Ինչու՞ է կարևոր նաև նշել, թե ինչ սոֆթ հմտություններ ունեք։
Դիտարկենք սոֆթ հմտությունների մի քանի օրինակ․ ժամանակի կառավարումը, ուշադրությունը մանրուքների նկատմամբ, անկողմնակալությունը, հարգալից վերաբերմունքը դիմացինի նկատմամբ և այլն։

Որքան մարդ, այնքան բնավորություն։ Այո՛, սակայն ձեր մարդկային հատկանիշները ևս կարևոր են ոչ միայն թիմային աշխատանքների արդյունավետության, այլև մասնագիտական շատուշատ խնդիրներ լուծելու համար։ Մի՛ մոռացեք նշել ձեր անձնային հմտությունների մասին, որոնք բազմաթիվ դռներ կարող են բացել ձեր առջև ոչ պակաս, քան մասնագիտական որակները։

staff.am-ի իրականացրած ՀՀ աշխատաշուկա 2023 զեկույցի համաձայն՝ ամենապահանջված սոֆթ հմտությունները հետևյալն են․ ժամանակի կառավարումը, թիմում աշխատելու ունակությունը, խնդիրների լուծումը, բանակցությունների հմտությունները, մանրուքներին ուշադրությունը։

Ամենապահանջված սոֆթ հմտությունները

Քայլ 7․ Նշել հետաքրքրությունները

Հետաքրքրություններն ու հոբբիները նշելն, իհարկե, պարտադիր չէ, բայց դրանք լավագուլյնս բացահայտում են ձեր պոտենցիալը։ Որևէ հոբբի կարող է ինչ-որ ժամանակ ծառայել նաև մասնագիտական խնդիր լուծելու համար ևս։ Ուստի, հավաքագրման մասնագետը գուցե որպես առավելություն դիտարկի ձեր CV-ն՝ հենց հոբբիների շնորհիվ․ չէ՞ որ հնարավոր է հետաքրքրություններով և հոբբիներով էլ հենց տարբերվեք մյուս թեկնածուներից։

Քայլ 8․ Հավելյալ հղումներ

Կան գործատուներ, որոնք պահանջում կամ նախընտրում են, որ կցեք նաև սոցիալական էջի, բլոգի կամ մասնագիտական պորտֆոլիոյի հղումը։

Պետք է հստակեցնել, որ սոցիալական էջ ասելով՝ գործատուն նկատի ունի ոչ թե այն էջերը, որտեղ կիսվում եք միայն ձեր անձնական կյանքից դրվագներով, այլ ձեր պրոֆեսիոնալությունը ներկայացնող հարթակները։

Հղումները չպետք է լինեն երկար։ Հիշեք, որ վիզուալ հեշտ ընթեռնելի և քիչ ժամանակատար CV-ն առավել շատ հնարավորություններ ունի՝ հայտնվելու «Short-list»-ում։

Ինչպես կազմել CV

Քայլ 9․ Ուսումնասիրել հաստիքի պահանջները մանրամասնությամբ

CV-ն համապատասխանեցրեք տվյալ հաստիքին՝ ներառելով հիմնականում հենց այն տեղեկատվությունը, որն առնչվում է տվյալ հաստիքի պահանջներին։ Հաշվի առեք ընկերության կորպորատիվ մշակույթը։
Ձեր CV-ն պետք է արտացոլի նաև այն նպատակը, ըստ որի, դիմում եք այդ հաստիքին։

Ուղեկցող նամակ գրեք միայն այն դեպքում, երբ աշխատանքային հայտարարության վերջում տեսնում եք դրա վերաբերյալ  հավելյալ պահանջ։

Քայլ 10․ CV-ի ֆայլի ճիշտ ձևաչափ

CV-ն պետք է լինի PDF ֆորմատով: Ոչ մի դեպքում մի ուղարկեք CV, որը docx կամ ցանկացած այլ ֆորմատով է (բացառությամբ, եթե կա նման պահանջ գործատուի կողմից)։

Այն պետք է լինի առավելագույնը երկու էջից բաղկացած։ Նույնիսկ եթե դուք երկար տարիների փորձ ունեք, այն միևնույնն է պետք է հակիրճ լինի։

Մի քանի անգամ ստուգեք՝ համոզվելու, որ չկան տառասխալներ։ Օգտվեք համապատասխան ծրագրերից, որոնք կօգնեն ստուգել տառասխալները։

Ընտրեք առավելագույնս հեշտ ընթեռնելի տառատեսակ ու տառաչափ։

Ինքնակենսագրականի լեզվի ընտրության հարցում կրկին առաջնորդվեք հաստիքի պահանջով։ Եթե աշխատանքի հայտարարությունը հայերենով է, ապա ցանկալի է, որ CV-ն ևս նույն լեզվով լինի։

Խուսափեք չափից շատ գույներ և ուշադրությունը շեղող լրացուցիչ նշաններ ու դիզայնի էլեմենտներ ներառելուց։

Էլեկտրոնային CV-ներում QR կոդեր ներառելը միայն բարդացնում է գործընթացը, քանի որ մեծ հավանականությամբ մասնագետը ձեր CV-ին ծանոթանալու է համակարգչով, ինչը QR կոդը սքանավորելու համար լրացուցիչ հարմարանքից օգվելու անհրաժեշտություն կառաջացնի։

Քայլ 11Ստեղծել կամ թարմացնել ձեր օնլայն CV-ն մասնագիտական հարթակներում

ՀՀ-ում գործող  լավագույն օնլայն CV հարթակներից  է staff.am-ը։ Այստեղ կգտնեք «Դիմորդի համար» բաժինը։ Օնլայն CV ունենալու և այն պարբերաբար թարմացնելու համար սա քիչ ժամանակատար ու արդյունավետ գործիք է։ Նախ, այն կարող եք լրացնել եռալեզու, իսկ տեղեկատվության դասավորվածությունն արդեն հարմարեցված է վերոնշյալ պահանջներին՝ դարձնելով ձեր այցեքարտը գրագետ, պրոֆեսիոնալ և մրցունակ։ 

Կարող եք ներբեռնել նաև մոբայլ հավելվածը և արագ ու դյուրին կերպով դիմել որևէ հաստիքին։

Գրանցվելով «Դիմորդի համար» բաժնում՝ հնարավորություն եք տալիս նաև գործատուներին տեսնել ձեր մասնագիտական էջը՝ հիմնվելով այն բանալի բառերի վրա, որոնք դուք նշել եք ձեր մասնագիտական, կրթական և տեղեկատվության համար նախատեսված այլ դաշտերում։

CV կազմելու համար օգտվել ենք Career Factory by staff.am-ի «4C» դասընթացի 2-րդ մոդուլի տեսադասից, որտեղ մանրամասն ներկայացվում են, թե ինչ քայլեր են անհրաժեշտ պրոֆեսիոնալ ու մրցունակ CV ստեղծելու համար։ Վստահաբար, այս տեսադասն օգտակար կլինի նաև ձեզ համար։ 

Հույս ունենք, որ մեր խորհուրդները օգտակար կլինեն պրոֆեսիոնալ ու մրցունակ CV ունենալու համար՝ ուղղորդելով ձեզ դեպի երազանքների աշխատանք։


Գրագետ և պրոֆեսիոնալ CV-ի օրինակ


Ինչպես կազմել CV
Powered by staff.am.