AOByte-ը ծրագրային ապահովման լուծումներ մշակող ընկերություն է՝ մասնագիտացած մեծ համակարգերի ստեղծման ոլորտում։ Ընկերությունը հիմնադրվել է 2016 թվականին և հասցրել է վաստակել պրոֆեսիոնալ և վստահելի գործընկերոջ համբավ՝ աշխատելով ինչպես տեղական, այնպես էլ միջազգային հաճախորդների հետ։
Read the article in English.
Շարունակելով staff.am-ի այցերը ՀՀ լավագույն գործատուներին, այս անգամ, հյուրընկալվել ենք AOByte-ի գրասենյակ՝ նպատակ ունենալով ծանոթանալու թիմին և մի լավ հարց ու փորձ անելու ընկերության գործունեության, կարիերայի հնարավորությունների, արժեքների, ներթիմային աշխատանքային գործընթացների և այլ հետաքրքիր թեմաների շուրջ։
Մեր զրույցը սկսեցինք ընկերության հիմնադիր տնօրեն Տիգրան Սարգսյանի հետ, ով մեզ պատմեց AOByte-ի գործունեության և թիմում աշխատանքային մթնոլորտի մասին։
«Համագործակցելով մեր գործընկերների հետ, նրանց համար ստեղծում ենք առողջապահական և ֆինանսական մեծ համակարգեր։ Մենք համագործակցում ենք ինչպես ներքին, այնպես էլ արտաքին շուկաներում։
AOByte-ում աշխատանքային մթնոլորտը հետևյալն է՝ մենք հավատում ենք վստահությանը, չենք հավատում, որ աշխատատեղում պետք է խիստ հսկողություն սահմանել, այլ հավատում ենք հակառակին՝ երբ կա վստահություն, երբ դատում ես ըստ արդյունքների, ապա ստանում ես նաև լավագույն արդյունքները»։
Տիգրան Սարգսյան Co-founder, CEO
Ծանոթացանք նաև ընկերության Tech lead Ստեփան Սմբատյանի հետ, ով միացել է թիմին դեռ 2019 թվականից և մինչ օրս շարունակում է իր գործունեությունն այստեղ։ Առիթը բաց չթողեցինք և հարցրինք Ստեփանին միևնույն ընկերությունում տևական ժամանակ աշխատելու պատճառների մասին։
Մասնագիտական լճացման բացակայությունը, նոր նախագծերի հետ մեկտեղ նոր հնարավորությունները, փորձնակության ընթացքում դասընթացավարությունը, թիմակիցների հետ փորձի փոխանակումը և իհարկե թիմը պահում են նրան AOByte-ում։
Ստեփան Սմբատյան, Tech lead
Մեր զրույցի ընթացքում պարզեցինք, որ AOByte-ում կարիերայի աճի մեծ հնարավորություններ կան, ինչի լավագույն ապացույցը թիմակիցների հաջողության պատմություններն են ընկերության ներսում։ Գայանե Մուրադյանը, ով իր ճանապարհն AOByte-ում սկսել է որպես ծրագրավորող, այժմ Tech lead է։ Նա մեզ պատմեց ընկերությունում կարիերայի աճի հնարավորությունների մասին՝ իր իսկ օրինակով։
«Աճի հնարավորություններն AOByte-ում շատ են։ Երբ 4 տարի առաջ միացա թիմին, ես չունեի հաստիքով անհրաժեշտ tech stack-ը, բայց AOByte-ում մենք մտածում և առաջնորդվում ենք նրանով, որ ծրագրավորող լինելն արդեն իսկ բավարար է այս գործում հաջողության հասնելու համար։
Գայանե Մուրադյան, Tech lead
Նաև շատ կարևոր է, որ AOByte-ում դու միայն մեխանիկական աշխատանք չես կատարում։ Ցանկացած առաջադրանքի շրջանակում մենք թիմով քննարկում ենք, լուծումներ ենք փնտրում և ընտրում ենք լավագույնը։ Դա շատ է նպաստում մասնագիտական աճին»։
Մասնագիտական աշխարհ նոր մուտք գործող անհատներին խրախուսելը ևս AOByte-ի մշակույթի մի մասն է, ինչը փաստում են ինչպես ընկերության կողմից կանոնավոր կազմակերպվող մասնագիտական զարգացման ծրագիրը, այնպես թիմում փորձնակների ներգրավումը։ Նարեկ Ավետիսյանը, ով միացել է թիմին որպես ծրագրավորման փորձնակ, այժմ աշխատում է որպես ծրագրավորող։
«AOByte-ում պրակտիկան ինձ հնարավորություն տվեց ավելի խորացնելու իմ մասնագիտական գիտելիքներն ու հմտությունները, յուրացնելու այն ասպեկտները, որոնց չեմ տիրապետել և վստահ կիրառել դրանք պրակտիկայում։
Ըստ իս պրակտիկան նման է դպրոցում առաջին դասարան գնալուն։ Դու ձեռք ես բերում կոնկրետ ձեռագիր, և այդ առումով, ուրախ եմ, որ հենց AOByte-ում եմ կերտել իմ ձեռագիրը»։
Նարեկ Ավետիսյան, Software developer
Զրույցը շարունակեցինք Անահիտ Ներսիսյանի հետ, ով ընկերության նախագծերի ավագ ղեկավարն է։ Անահիտը պատմեց AOByte-ի աշխատելաոճի և ներթիմային աշխատանքային գործընթացների մասին։
Նրա խոսքով՝ նոր պրոդուկտների համար նոր թիմեր ձևավորելու մարտահրավերները հաղթահարում են հետևյալ սկզբունքներով՝
Աշխատակիցներին ներգրավել ինչպես նախագծում, այնպես էլ կազմակերպության ընդհանուր գործընթացներում,
Փոփոխվող միջավայրում պահպանել Agile-ի սկզբունքները,
Թիմերին դարձնել ինքնուրույն իրենց աշխատանքում,
Ապահովել նախագծերի հանձնումը ժամանակին,
Ստեղծել հավելյալ արժեք հաճախորդների համար։
Անահիտ Ներսիսյան, Senior Project Manager
Հայտնվելով AOByte-ի գրասենյակում չէինք կարող բաց թողնել հնարավորությունը զրուցելու Դիանա Գալստյանի՝ ընկերության HR Manager-ի հետ, ով էլ խոսեց այն գործոնների մասին, որոնք նպաստում են AOByte-ում աշխատանքի արդյունավետ կազմակերպմանը։
«АОByte-ում մենք հավատում ենք, որ լավագույն գաղափարներն ու լուծումները գալիս են թիմային աշխատանքի արդյունքում: Մենք զարգացնում ենք համագործակցային մշակույթ, որը խրախուսում է բաց հաղորդակցությունը, փոխադարձ աջակցությունը և ընդհանուր նպատակների սահմանումը, ինչն էլ ընկած է կազմակերպության հաջողության հիմքում»։
Դիանա Գալստյան, HR Manager
Դե իսկ վերջում որոշեցինք պարզել, թե ինչպես ընկերության թիմակիցները կնկարագրեն AOByte-ը մեկ բառով։ Հարցի պատասխանները ևս մեկ անգամ փաստում են, որ այստեղ մարդիկ ամենօրյա աշխատանքային առաջադրանքներից զատ, բացահայտում են սեփական ներուժն ու հնարավորությունները, գնահատում են ընկերական և համախմբված միջավայրը, միմյանց աջակցելու մշակույթը… Այս շարքը կարող ենք երկար թվել, բայց, փոխարենն առաջարկում ենք դիտել տեսանյութն ու իմանալ հենց AOByte-ցիների պատասխանները։
Ամփոփելով, նշենք, որ շատ տպավորված ենք մեր այցից, քանի որ թիմում ընկերական ու ուրախ մթնոլորտը զգացինք հենց առաջին վայրկյաններից և այդ զգացողությունը չլքեց մեզ մինչև վերջ։ Դե իսկ այն ջերմությունը, որով խոսում էր թիմն AOByte-ի մասին, դարձնում է այն հրաշալի վայր աշխատելու, երազելու և կատարելագործվելու համար։
