Դեկտեմբերի 16-20-ը Դիլիջանի միջազգային դպրոցում կայացավ ՀՀ բարձր տեխնոլոգիական արդյունաբերության նախարարության եւ ՀՀ Սփյուռքի գործերի գլխավոր հանձնակատարի գրասենյակի հետ համատեղ իրականացվող «Ներուժ» սփյուռքի տեխնոլոգիական ստարտափների ծրագիրը։ Ծրագրին իր հատուկ մասնակցությունն ուներ նաև staff.am-ը՝ նույնպես նպատակ ունենալով աջակցել հայրենադարձությանը, տաղանդների ներհոսքին, նոր ընկերությունների ստեղծմանն ու աշխատաշուկայի զարգացմանը։
Այս տարի «Ներուժ»-ին մասնակցում էին 17 երկրից ընտրված 47 տեխնոլոգիական ստարտափների 80 ներկայացուցիչներ:
Քառօրյա ծրագրի օրակարգը բավականին հագեցած էր, staff․am համահիմնադիր Լուիզա Ավետիսյանը մասնակցեց «Ինչպե՞ս զբաղվել բիզնեսով Հայաստանում» (How to do business in Armenia?) թեմայով պանելային քննարկմանը:
Ներկայացրեց իր մոտեցումները բիզնես ստեղծելու և կառավարելու վերաբերյալ՝ համեմատական եզրեր տանելով staff.am ստարտափի հայրենիքում գործունեության և այլ երկրների միջև, որտեղ գործում է staff.am #HRTech պրոդուկտը՝ HireBee-ն։
«Եթե դիտարկենք ՀՀ աշխատաշուկան և դրա գրավչությունը միջազգային ստարթափների և ՏՏ ընկերությունների համար, ապա իմ կարծիքը հետևյալն է։ Հայաստանում հնարավորություններ կան ինչպես մեծ և արդեն կայացած ՏՏ ընկերությունների համար, այնպես էլ փոքր ստարթափների համար։ Ըստ staff.am-ի վիճակագրական տվյալների, ՀՀ-ում թափուր աշխատատեղերի 38%-ը ՏՏ ընկերություններում է, իսկ բոլոր աշխատանքների 20%-ը ծրագրավորման ոլորտում են։
Այս ցուցանիշներն ավելի են բարելավվել 2019թ․-ին։ Սա խոսում է այն մասին, որ ՏՏ ոլորտը զարգանում է, բացվում են նոր ընկերություններ։ Իհարկե, դժվարություններ կան, պետք է սթափ գնահատել բոլոր հնարավորությունները, հասկանալ այն առաջարկը, որը ստարթափը կարող է ներկայացնել աշխատաշուկայում և արդյոք ցանկալի արդյունքը համադրելի է առաջարկի հետ»։
Ծրագրի ավարտին $15.000, $20.000 եւ $25.000 հազար դրամաշնորհի արժանացան գաղափարի մակարդակում գտնվող երեք ստարտափներ՝ «Marathon», «eBin», «SoFetch»։ Եվս 3 ստարտափի՝ «Schedex», «Garoon Tech» եւ «Fact industries», որոնք գտնվում էին պրոդուկտը մեկնարկելու մակարդակում, շնորհվեցին համապատասխան դրամաշնորհներ:
Սփյուռքի գործերի գլխավոր հանձնակատար Զարեհ Սինանյանը եւ Բարձր տեխնոլոգիական արդյունաբերության նախարարի տեղակալ Արմեն Աբրոյանը մրցույթում հաղթած ստարտափներին հանձնեցին պետական դրամաշնորհները, իսկ staff.am համահիմնադիր և ղեկավար Վահե Ավետիսյանը staff.am նվեր-շնորհակալագրեր հանձնեց այն հաղթող ստարտափներին, որոնք արդեն շուկա մուտք գործելու մակարդակում են և անհրաժեշտ է թիմ հավաքագրել։ staff.am նվեր-շնորհակալագրերի շնորհիվ ստարտափները կարող են օգտվել staff.am HR գործիքներից և համալրել իրենց թիմը արագ և հեշտ։
«Ներուժ» սփյուռքի տեխնոլոգիական ստարտափների ծրագրի իրականացման մյուս գործընկերներն են Հայաստանի բիզնես հրեշտակների ցանցը (BANA), Հայաստանի գիտության և տեխնոլոգիաների հիմնադրամը (FAST), Դիլիջանի միջազգային դպրոցը (UWC), Հայաստանի զարգացման նախաձեռնություններ հիմնադրամը (IDeA) և Օրիոն համաշխարհային նորարարություններ ՍՊԸ-ն (Orion Worldwide Innovations LLC)։
Ի դեպ, 2018թ․-ին ծրագրին մասնակցած ստարտափներից «Brushette», «Grüv» և «Storegear», մեկ տարվա ընթացքում իրենց բիզնեսը գրանցել են Հայաստանում և ստեղծել 14 նոր աշխատատեղ:
«ՆԵՐՈՒԺ» ՍՓՅՈՒՌՔԻ ՏԵԽՆՈԼՈԳԻԱԿԱՆ ՍՏԱՐՏԱՓՆԵՐԻ
ԾՐԱԳԻՐԸ ԼՈՒՍԱՆԿԱՐՆԵՐՈՒՄ
