staff.am-ի մեր թիմն այս անգամ հետաքրքիր ուսումնասիրություն է անցկացրել պարզելու առաջադրված 5 գործոնների կարևորությունը գործատուների ընտրության հարցում:
Մասնակիցներին առաջարկվել է 1-5 սանդղակով գնահատել հետևյալ չափանիշների կարևորությունը՝ Աշխատավարձ, Աշխատանքային ժամեր, Թիմի/Ընկերության պրոֆեսիոնալիզմ, Արտոնությունների (բենեֆիթների) փաթեթ և Ընկերության վարկանիշ:
Վիճակագրական հետազոտության արդյունքները հիմնված են 1000 հոգանոց ընտրանքով անցկացված հարցման մասնակիցների կարծիքի վրա։ Հարցումն անց է կացվել 2017 թ. օգոստոս ամսին, որի արդյունքներն ամփոփվել են 2017թ․ սեպտեմբեր ամսին։
1. ՄԱՍՆԱԿԻՑՆԵՐԻ ՏԱՐԻՔԱՅԻՆ ԽՄԲԵՐԻ ԲԱՇԽՎԱԾՈՒԹՅՈՒՆԸ ԵՎ ՈԼՈՐՏՆԵՐԸ
Մասնակիցների գերակշռող մասը մինչև 30 տարեկան անձինք են, ինչը բնական է` հաշվի առնելով այս տարիքային խմբի առավել ակտիվ մասնակցությունը տարբեր ոլորտներում:
Իսկ զբաղվածության ոլորտների տեսանկյունից պատկերը նույնպես զարմանալի չէ` հաշվի առնելով նշված ոլորտների առավել արագ զարգացման միտումը և ծավալները:
Մի փոքր մանրամասնենք նաև թե կարիերայի զարգացման ինչ փուլում են գտնվում մասնակիցների գերակշռող մասն ըստ տարիքային խմբերի.
18-22 տարիքային խումբ – Ռեսպոնդենտների այս խումբը դեռևս գտնվում է աշխատաշուկայի գնահատման և ուսումնասիրման փուլում (Dr. Randall S. Hansen/ Publisher of Quintessential Careers Press)։ Հիմնական նպատակն աշխատաշուկային ծանոթանալն է և նոր աշխատանքի հնարավորությունների բացահայտումը։
22–30 տարիքային խումբ – Գտնվում են կարիերայի անցումային փուլում (Dr. Randall S. Hansen/ Publisher of Quintessential Careers Press) և կրկին ակտիվորեն ուսումնասիրում են ժամանակակից աշխատաշուկան։
2. ԱՇԽԱՏԱՆՔԱՅԻՆ ԺԱՄԵՐ, ԹԻՄԻ ՊՐՈՖԵՍԻՈՆԱԼԻԶՄ
Ռեսպոնդենտների կեսը աշխատանք փնտրելիս կամ աշխատանքի առաջարկ ստանալիս ամենամեծ ուշադրությունը կդարձներ աշխատանքային ժամերի, գրաֆիկի և անձնակազմի պրոֆեսիոնալիզմի վրա։
Այսինքն, աշխատաշուկայում ժամանակակից միտումը հետևյալն է․
Աշխատակիցներն առաջին հերթին կարևորում են աշխատանք – կյանք բալանսը, առավել պրոֆեսիոնալ թիմում աշխատելը և կարիերայի զարգացման հնարավորությունը աշխատանքային միջավայրում։ Այս արդյունքը նաև պայմանավորված է նրանով, որ ռեսպոնդենտների մեծ մասը Millenial-ներ են (մինչև 35 տարեկան անձինք)։
Մեծամասնություն են կազմում նաև հարցման մասնակիցները, որոնք աշխատավարձով պայմանավորված աշխատանքի ընտրություն են կատարում (440 հոգի՝ ամենակարևոր, 410 հոգի՝ կարևոր), իսկ բենեֆիթներն ունեն երկրորդային կարևորություն։
3. ԱՇԽԱՏԱՎԱՐՁ ԵՎ ԱՐՏՈՆՈՒԹՅՈՒՆՆԵՐ (ԲԵՆԵՖԻԹՆԵՐ)
Ըստ աշխատակիցների վարքի ուսումնասիրության (“Impact of Rewards on Employee Behaviour”/ European Journal of Business and Management, 2015), աշխատակիցներն առնվազն ակնկալում են համապատասխան աշխատավարձ, ապահով աշխատանքային պայմաններ, արդար մոտեցում, իսկ այնուհետև կախված նրանից, թե որ տարիքային խմբում և կարիերայի զարգացման որ փուլում են գտնվում, ենթագիտակցական պահանջ են զգում աշխատանքային որոշակի արտոնությունների նկատմամբ (Անհատական՝ ֆինանսական, ուսուցման և զարգացման, Հանրային՝ արձակուրդային, աշխատանքային միջավայր)։
Հետաքրքիր է նաև այն, որ ՀՀ ընկերությունների շատ փոքր մասն է տրամադրում որևէ հավելյալ արտոնություններ: Այդ իսկ պատճառով հարցման մասնակիցներն առավել մեծ տեղ են տալիս աշխատավարձին, չնայած որ տրամադրվող արտոնությունների փաթեթներն էլ գնալով առավել մեծ կարևորություն են ստանում:
3. ԸՆԿԵՐՈՒԹՅԱՆ ՎԱՐԿԱՆԻՇ
Հետազոտության արդյունքներից ակնհայտ է նաև, որ աշխատանք փնտրելիս կամ աշխատանքի առաջարկն ընդունելիս թեկնածուները վերը թվարկված չափանիշները դիտարկելուց հետո հաշվի են առնում նաև ընկերության վարկանիշը։
Վերջինիս դերը նույնպես կարևոր է, քանի որ աշխատանքի առաջարկը մի քանի գործոնների համախումբ է՝ առաջարկվող աշխատանքի տեսակի և գործատուի վարկանիշի։ Աշխատանքի տեսակը նմանատիպ լինելու դեպքում թեկնածուն սկսում է դիտարկել ընկերության կորպորատիվ վարկանիշը, աշխատանքային միջավայրի վարկանիշը և սոցիալական վարկանիշը (E. Michaels, H. Handfield-Jones and B. Axelrod, “The War for Talent” (Boston: Harvard Business School Press):
Սոց. մեդիայի իրականության կոնտեքստում, ընկերության վարկանիշի կարևորությունն ու դերը շատ ավելի ակնհայտ են: Ընկերության կորպորատիվ մշակույթի և գործատուի վարկանիշի մասին ինֆորմացիան հազարավոր կիլոմետրեր է անցնում և հասանելի է դառնում սոց. մեդիայի շնորհիվ: Մյուս կողմից ընկերության վարկանիշով է պայմանավորված անհատի հետագա կարիերայի զարգացումը: Շատ ուսանողներ այսօր նախընտրում են բարձր վարկանիշ ունեցող ընկերությունը որպես կարիերայի լավ սկիզբ, չնայած որ ոչ միշտ են ստանում իրենց ցանկալի աշխատավարձը:
ԱՄՓՈՓԵՆՔ.
Այսպիսով, անկախ այն հանգամանքից, թե պոտենցիալ թեկնածուները զբաղվածության որ ոլորտն են ներկայացնում, նոր աշխատանք փնտրելիս որոշ չափանիշներ առաջնային ազդեցություն ունեն աշխատանքի ընտրության վերջնական որոշում կայացնելու վրա՝ աշխատանքային ժամեր և գրաֆիկա, պրոֆեսիոնալիզմ, աշխատավարձ։
Այս գործոնները համարվում են մոտիվացիայի հիմնական աղբյուրը, և եթե համապատասխանում են թեկնածուի ակնկալիքներին, աշխատանքի առաջարկը կարող է ընդունվել։
Ինչպես ցույց են տալիս հարցման արդյունքները, բենեֆիթների փաթեթները և ընկերության վարկանիշը կարող են ունենալ մասնակի ազդեցություն վերջնական որոշման վրա։ Ազդեցության աստիճանը պայմանավորված է աշխատանք փնտրողի տարիքային, կարիերայի զարգացման փուլով, ինչպես նաև մասնագիտական ոլորտով: Մասնավորապես, ՏՏ ընկերությունների կողմից առաջարկվող արտոնությունների փաթեթները բավականին ընդգրկուն են, տրամադրելով առողջության ապահովագրությունից մինչև տարեկան բոնուսներ և նույնիսկ ընկերության շահութաբաժիններ, այդ իսկ պատճառով բենեֆիթներն այս դեպքում առավել մեծ դեր կարող են ունենալ: Բանկերը և միջազգային կառույցները նույնպես տրամադրում են արտոնությունների գրավիչ փաթեթներ, բայց ինչպես արդեն նշեցինք բենեֆիթային փաթեթները դեռ շատ մեծ տարածում չունեն ՀՀ բոլոր ընկերություններում, և հնարավոր է դա է պատճառը, որ արտոնություններով հետաքրքրվածությունն ավելի քիչ է, քան մյուս գործոնների համար:
Հուսով ենք հետազոտության արդյունքները Ձեզ հետաքրքրեցին և օգտակար կլինեն թե՛ որպես գործատու, թե՛ որպես աշխատանք փնտրող: Հետևեք մեր StaffBlog-ին նոր և հետաքրքիր հետազոտությունների մասին առաջինը տեղեկանալու համար:
