Անցած տարին`Թումոյում

Թումո լաբերի և 42 Երևանի նոր շենքը

ԵՄ Թումո ինժեներության և կիրառական գիտությունների համալիրի կրթական նախագծերը` Թումո լաբերը և 42 Երևանը ժամանակավորապես տեղափոխվեցին նոր շենք: Թումանյանի այգում գտնվող, 1960-ականներին կառուցված այս շենքում խորհրդային տարիներին գործել է կենտրոն, որը զբաղվել է պատանիների ու երիտասարդ մասնագետների կրթությամբ էլեկտրոնային տեխնիկայի ոլորտում: Ավելին քան 30 տարի անց այս շենքին վերադարձվեց իր առաջնային դերը` որպես կրթության և տեխնոլոգիաների կենտրոն:

Թումոյի ծրագրավորողների թիմի ռեբրենդինգը

Թումոյի ծրագրավորողների թիմին ծանո՞թ եք: Այս թիմի շնորհիվ ստեղծվել և աշխարհի տարբեր կենտրոններում գործում է Թումոյի կրթական հարթակը` Թումո շավիղը, և մի շարք այլ պրոդուկտներ: Այն բաղկացած է ծրագրային ապահովման ինժեներներից, դիզայներներից, օգտատերերին աջակցություն ցուցաբերող և որակի ապահովման (QA) մասնագետներից:

Ծրագրավորողների թիմի գլխավոր մոտիվացիան ուսանողների հետ ամենօրյա շփումն է, և, իհարկե, այն միտքը, որ հենց իրենք են ծրագրավորում այն համակարգը, որն օգնում է տասնյակ հազարավոր պատանիների ստանալ որակյալ այլընտրանքային կրթություն:

Նոր Թումո տուփեր

Վերջին մեկ տարվա ընթացքում Թումո Հայաստան ծրագրի շրջանակներում Թումոյի կրթական ծրագիրը հասանելի դարձավ Հայաստանի ու Արցախի մի շարք քաղաքներում` Սևանում, Վայքում, Կապանում, Արթիկում, Մարալիկում, Ասկերանում, Մարտակերտում և Մարտունիում:

Թումո տուփը փոքր, սակայն տեխնիկապես հագեցած մինի Թումո է։ Այն կարող է տեղադրվել ցանկացած քաղաքում կամ գյուղում և ծառայել որպես ինքնուսուցման տարածք տեղի պատանիների համար։ Ուսանողներն ինքնուսուցման փուլն անցնում են իրենց քաղաքում, իսկ գործնական դասընթացների մասնակցելու համար մեկնում են մոտակա Թումո կենտրոններ: Յուրաքանչյուր Թումո տուփ հնարավորություն է տալիս տեխնոլոգիաների և դիզայնի ոլորտում կրթությամբ ապահովել տարեկան շուրջ 400 պատանու։

Ուրիշ հուլիս

Հայաստանի բոլոր Թումո կենտրոնների և տուփերի ուսանողները հնարավորություն ունեցան աշխատելու 59 երկրներից ժամանած լավագույն մասնագետների և իրենց սիրելի Թումո դասընթացավարների հետ`100-ից ավելի աշխատարանների շրջանակում ստեղծելով բազմազան ու բազմաբնույթ նախագծեր: 😎

Միջազգային Թումո կենտրոններ

Այս տարվա հունվարին բացվեց 7-րդ միջազգային Թումո կենտրոնը Լիոն քաղաքում` արդեն 2-րդը Ֆրանսիայում: Սա առաջին կենտրոնն է, որն ունենալու է իրեն կապվող Թումո տուփեր, ընդունելու է 1500 ուսանողի, իսկ կրթական ծրագիրը ընդգրկելու է 8 ոլորտ։

Թափուր հաստիքներ

Թումոն միշտ փնտրում է ստեղծարար և եռանդուն մարդկանց իր մեծ թիմին միանալու համար: Թափուր հաստիքները կարող եք տեսնել staff.am-ում ինչպես նաև Թումոյի պաշտոնական կայքում` www.tumo.org/jobs.