Հաջողության հասնելու համար «խելացի» լինելը բավարար չէ

Հաճախ էի ինձ հարցնում, թե ինչ է Զգայական ունակությունը (Emotional intelligence), և ինչ կապ այն կարող է ունենալ արդյունավետ աշխատելու հետ․․․և ահա մի քիչ ուսումնասիրելուց հետո, կիսվում եմ Ձեզ հետ իմ բացահայտումներով․

Մեզնից շատերն են տեղյակ IQ-ի մասին (Ինտելեկտի գործակից), որը նախատեսված է ինտելեկտուալ ունակությունները չափելու համար։ Գործակիցը հաշվարկվում է մի քանի թեստերի արդյունքում։ Բարձր IQ-ն խորհրդանշում է ավելի լավ ճանաչողական ունակությունների, սովորելու և ըմբռնելու կարողությունների առկայությունը։ Հետևաբար, ի՞նչ կարելի է ենթադրել սրանից․ Բարձր IQ ունեցող մարդիկ ավելի հաջողակ են աշխատանքում և ողջ կյանքի ընթացքում։

– Իսկապե՞ս։

– Բնավ, ո՛չ։

Այս ենթադրությունը հերքվեց հետևյալ պատճառաբանությամբ։
«Հաջողության հասնելու համար «խելացի» լինելը բավարար չէ»։ Զգայական ունակությունը (EI) ավելի ժամանակակից տերմին է, որն առաջ է քաշվել 1990-ականների կեսերին Դենիել Գոլմանի կողմից։

Զգայական ունակությունը(EI)  կարողությունն է ճանաչելու և Ձեր, և մյուսների զգացմունքները, ու հասկանալու, թե ինչպես է այն ազդում շրջապատող մարդկանց վրա։

Հարց․ Ի՞նչ ազդեցություն ունի զգայական ունակությունը (EI) մասնագիտական հաջողության վրա: Պատասխանը՝ շա՜տ մեծ։ Զգայական ունակությունը(EI) մի շարք սոֆթ հմտությունների՝ որոշումների կայացման, թիմային աշխատանքի, սոցիալական հմտությունների, հաղորդակցության, և այլ հմտությունների հիմքն է, առանց որոնց անհնար է պատկերացնել արդյունավետ աշխատանքային առօրյան։ Այն միանշանակ առնչություն ունի, թե ինչ եք խոսում օրվա ընթացքում և ինչպես եք կատարում յուրաքանչյուր քայլը։ Երբ զգում եք դիմացինի զգացմունքները, այդ թույլ է տալիս ավելի արդյունավետ կառավարել ձեր փոխհարաբերությունները։ Հետևաբար, մարդիկ, ովքեր ունեն բարձր Զգայական ունակություն (EI), ավելի հաջողակ են իրենց աշխատանքում։ Օրինակ, էլ․նամակ ուղարկելիս, բարձր EI ունեցող աշխատակիցներն ավելի հավանական է, որ կստանան ակնկալվող պատասխանները ժամանակին, քանի որ նրանք կարողանում են հասկանալ դիմացինին և դա օգտագործում են իրենց նպատակներին հասնելու ճիշտ ուղու ընտրության հարցում։

Իհարկե, զգայական ունակություններ (EI) զարգացնելը աշխատատար գործ է և պահանջում է ժամանակ, ջանքեր, ինչու չէ նաև աջակցություն։ Այն ենթադրում է հրաժարվել զգացմունքների, մտքերի, գործողությունների հին սովորույթներից և ստեղծել նորը։ Հետևաբար, մեզնից յուրաքանչյուրը պետք է աշխատի մեր զգայական ունակությունները(EI) զարգացնելու վրա, որը կօգնի ավելի լավ հասկանալ և ընկալել մարդկանց զգացմունքներն ու մեծացնել աշխատանքում հաջողության հասնելու հավանականությունը։

Ահա մի քանի օգտակար խորհուրդ EI-ը զարգացնելու համար։ Հուսով ենք դրանց կիրառումը կօգնի Ձեր կարիերայի առաջընթացին:

1. Սկսեք Ձեզանից․
Տհաճ նամա՞կ եք ստացել աշխատավայրում, խնդիրնե՞ր ունեք ղեկավարի կամ կոլեգայի հետ, կամ այլ նման բան, որը սովորաբար Ձեզ արագ հունից կհանե՞ր: Նման դեպքերում նախ պետք է հասկանանք ինքներս մեզ և կատարվածի բուն պատճառները, որոնք կօգնեն նման խնդիրներին մոտենալ ավելի հավասարակշռված և արձագանքել փաստերին, այլ ոչ թե զգացմունքներին:

2. Հաշվի առեք Ձեր շրջապատի կարծիքը.
Շատ ժամանակ մենք դժվարանում ենք բարդ իրավիճակներում ինքներս մեզ կողքից նայել: Սակայն, եթե օգնության դիմենք մեր շրջապատին ու ընկերներին և խնդրենք նրանց անաչառ կարծիքը, ապա մենք շատ հնարավոր է ստանանք ամբողջական պատկերը:

3. Մի ընդունեք քննադատությունը որպես անձնական վիրավորանք.
Իհարկե սա բավականին դժվար է, սակայն շատ կարևոր նախապայման Զգայական ունակությունները(EI) զարգացնելու համար: Ցանկացած քննադատություն իր մեջ որոշակի ճշմարտություն է պարունակում, փորձեք վիրավորվելուց առաջ դասեր քաղել:

4. Հապաղեք.
Հապաղել նշանակում է արձագանքել մի փոքր ուշացումով: Սա թերևս ամենակարևոր բանն է, որ Դուք կարող եք անել թե աշխատավայրում, թե հարազատների հետ ավելի առողջ մթնոլորտ ստեղծելու համար: Պատկերացրեք ինչքան ավելի դյուրին կլիներ ամեն ինչ, եթե մենք հերթական նամակին կամ հեռախոսազանգին բարկացած պատասխանելու փոխարեն մի քիչ հապաղեինք:

5. Պրակտիկա և ևս մեկ անգամ պրակտիկա.
Զգայական ունակությունը մեկ օրվա մեջ հնարավոր չէ զարգացնել: Կան մարդիկ, ովքեր բնավորությամբ ավելի հավասարակշռված են: Սակայն, եթե էմոցիոնալ մարդ եք, ապա մի քիչ ավելի ժամանակ և պրակտիկա կպահանջվի ցանկալի արդյունքներին հասնելու համար:

Հուսով ենք այս հետազոտությունը և խորհուրդները կօգնեն Ձեզ առավել զարգացնել Ձեր սոֆթ հմտությունները, բարձրացնել Զգայական ունակություն ասվածը:

Հեղինակ՝ Նազելի Բադալյան
Մարքեթինգի և հաղորդակցման ղեկավար
staff.am