staff.am-ը մեկնարկել է հետաքրքիր նախագիծ՝ «Հայաստանի լավագույն գրասենյակները», որի նպատակն է ֆոտոպատմությունների տեսքով ներկայացնել Հայաստանում գործող ընկերությունների ամենատարբերվող, գեղեցիկ, հարմար, ոճային և տրամադրող գրասենյակները։
Այցելել ենք QLess միջազգային ընկերության հայաստանյան գրասենյակ, որը բացվել է 2022 թվականի մարտին և առաջինն է ընկերության համար ԱՄՆ-ից դուրս։
Այս գեղեցիկ գրասենյակի կառուցման աշխատանքների մեծ մասը համակարգվել է դիզայներներ Նարինե Մարտիրոսյանի և Նարեկ Գասպարյանի կողմից։ Շինարարոթյան վերջնական փուլում Հայաստանում էին գտնվում QLess-ի SVP of Engineering Արմեն Ժամկոչյանը և դիզայներ Նարինե Մարտիրոսյանը, ովքեր արդեն տեղում համակարգում էին աշխատանքների ավարտական փուլը:
Արմենի խոսքով՝ մինչ նոր գրասենյակի բացումը հայաստանյան թիմի անդամները նախընտրում էին հեռավար աշխատել, սակայն բացվելուն պես աշխատակիցները մեծ սիրով և ոգևորությամբ նախընտրեցին աշխատել նման տրամադրող միջավայրում: Նարինե Մարտիրոսյանի առաջնային սկզբունքը ջերմ ու աչքը շոյող մթնոլորտի և առանձին ֆունկցիոնալ տարածքների՝ ներդաշնակության ապահովումն է։
Գրասենյակի տարածքի աշխատանքային հիմնական հատվածը գտնվում է երկրորդ՝ անտրեսոլային հարկում:
Առաջին հարկում գտնվում է կոնֆերանս սրահը՝ հետաքրքիր տեխնոլոգիական և դիզայնային լուծումներով:
Առաջին հայացքից թվում է՝ բացի փայտից և մետաղից, օգտագործվել է նաև քար, այնինչ, նման տպավորություն է ստեղծում QLess-ի տարբերանշանով պատը, որը, կարծես, աղյուսից շարված լինի, սակայն իրականում օգտագործվել է բարձրորակ պաստառ։
Գրասենյակին հավելյալ հարմարավետություն է հաղորդում ընդարձակ և լուսավոր խոհանոցը: Սրճարանից աշխատելու սիրահարների համար այս յուրովի գրասենյակը կատարյալ վայր է՝ սուրճ, հաճելի տեսարան ու տարատեսակ անուշեղեն:
Գրասենյակի ինտերիերի մեջ մեծ տեղ են գրավում տարատեսակ բույսերը, որոնք, համադրվելով նրբագիծ կահույքի հետ, ստեղծում են ուրույն մթնոլորտ։
Հանգստի հատվածն այնքան տրամադրող է, որ աշխատակիցներն այն հաճախ օգտագործում են որպես աշխատատեղ՝ իրենց ստեղծագործ մտքերն ի մի բերելու համար: Կահույքի մի մասը ներկրվել է Եվրոպայից, իսկ մնացածը պատրաստել է հմուտ կահույքագործ Վահագն Հարությունյանը։
Հանգստի հատվածը խոհանոցից առանձնանում է բնական բույսերի պատով, որը ստեղծում է այդքան անհրաժեշտ «կենդանի անկյունը»։
Այս տարվա սկզբից հայաստանյան թիմն արդեն հասցրել է մի շարք թիմբիլդինգներ կազմակերպել, հատկապես ԱՄՆ-ից եկած մասնագետներին երկրի մշակույթի հետ ծանոթացնելու նպատակով։ Այդ թիմբիլդինգների ժամանակ արված լուսանկարներն այժմ զարդարում են գրասենյակի պատերից մեկը։
QLess-ի հայաստանյան թիմը շատ արագ աճում է, իսկ դա նշանակում է՝ ավելի մեծ ու հետաքրքիր գրասենյակ ապագայում: Սակայն թիմն առայժմ վայելում է ներկա գրասենյակը՝ իր առանձնահատուկ լուծումներով ու անկրկնելի միջավայրով: Սակայն QLess-ի հիանալի միջավայրի հիմնական գրավականը այնտեղ աշխատող մարդիկ են:
