Տարբեր ժամանակաշրջաններում կանայք իրենց առանձնահատուկ ներդրումն են ունեցել մասնագիտական ոլորտների առաջընթացներում։ Եվ կանանց միամսյակը ևս մեկ հնարավորություն է խոսելու այն բոլոր ձեռքբերումների մասին, որոնց հեղինակները կանայք են։
staff.am-ում Կանանց միամսյակի կապակցությամբ ուրախ ենք մեկնարկել StaffMedia #ՀաջողակԿանայք նոր նախագիծ, որի շրջանակներում կիսվելու ենք տարբեր ոլորտներում հաջողակ կանանց կարիերայի պատմություններով։
Այսօր անչափ ուրախ ենք հարցազրույց ունենալ Հեռուստատեսային ոլորտում ճանաչված ու բոլորիս կողմից շատ սիրելի Հրաչուհի Ութմազյանի հետ, ոգեշնչվելու իր պատմությամբ ու մեր առօրյայում կիրառելու լավագույն խորհուրդները։
Ե՞րբ և ինչպե՞ս որոշեցիք սկսել Ձեր կարիերան։ Ի՞նչ հիմնական սկզբունքներով եք առաջնորդվում Ձեր կարիերայում։
Անկեղծ ասած, ես չեմ որոշել։ Կյանքի իրադարձությունները, հանդիպումներն իրենք իրենցով ասես, մեկը մյուսին հաջորդելով, ինձ համար ինչ-որ ճանապարհ են ստեղծել, և ես գնացել եմ առաջ։ Ինձ համար կյանքի և աշխատանքի համար սկզբունքային է, որ այսօր պետք է լինեմ ավելի լավը, քան երեկ էի, իսկ վաղը լինեմ ավելի լավը, քան այսօր։ Այսինքն, մշտապես աշխատեմ ինքս ինձ վրա, և ես վստահ եմ, որ պատրաստվածությունն է ստեղծում հնարավորություն։ Եթե դու պատրաստ ես, եթե դու աշխատում ես ինքդ քեզ վրա և ինչ-որ մի ձիրք կարողանում ես հղկել և կատարելագործել (կատարյալի ոչ մեկս հասնել չենք կարող, բայց դե կատարելագործվել), այդ ժամանակ էլ համապատասխան հնարավորությունն է թակում քո դուռը, որպեսզի դու կարողանաս այդ հմտությունդ որևէ տեղ, որևէ ոլորտում կիրառել։ Իմ պարագայում այդպես է եղել։ Ես, ինչքան հնարավոր է եղել, շատ տարբեր բաներ եմ փորձել իմ կարիերայում ու դրա արդյունքում ստացել եմ բացառիկ առաջարկներ և, իհարկե, նաև դարձել եմ աշխարհում թիվ 1 և Հայաստանում առաջին միջազգային ամսագրի գլխավոր խմբագիրը։
Որպես կին ո՞րն եք համարում Ձեր ամենամեծ մարտահրավերը, որ երբևիցե հանդիպել եք այս ոլորտում։
Շատ լավ ծանոթ լինելով այն բոլոր մարտահրավերներին, որոնց կանայք բավականին հաճախ հանդիպում են, այնպես է ստացվել իմ կյանքում, որ ես այդ մարտահրավերներին երբևիցե չեմ հանդիպել։ Իմ ձայնն իսկապես լսել են, աշխատանքն էլ գնահատված է եղել, չեմ ունեցել խնդիր լսելի դարձնելու իմ ձայնը զուտ նրա համար, որ ես կին եմ։
Չմոռանանք նաև, որ ես աշխատել եմ կանացի ամսագրում՝ Cosmopolitan Հայաստանում, որը հենց կանանց աշխարհ է, թեև մենք փայլուն տղամարդ աշխատակիցներ էլ ենք ունեցել։ Ավելին ասեմ, շատ ավելի բարդ է, երբ հիմնականում կանանցից բաղկացած թիմ է, և կա այնպիսի թյուր կարծիք, որ անհնար է՝ այդ թիմը գործի։ Մենք լիովին հակառակն ապացուցեցինք, որ հենց կանայք, երբ թիմ են դառնում, սարեր կարող են շուռ տալ և անհնարը դարձնել հնարավոր։
Անգամ հիմա էլ, երբ ես ինչ-որ նախագծեր եմ անում, փորձում եմ հենց այդ թիմի անդամներին համախմբել, ու մենք միասին հաջողության հասնենք։ Մենք միշտ միմյանց մեջքի կանգնած ենք։ Մենք փորձեցինք ապացուցել հակառակը, որ գոյություն ունի կանանց ուժ, և ես շատ ուրախ եմ նաև, որ իմ ընկերուհիների շրջանակն այնպիսին է, որ մենք միշտ անընդհատ իրար բարձրացնում ենք, միշտ փորձում ենք մեկս մյուսի հաջողությամբ ուրախանալ և այդ հաջողության մասնիկը դառնալ։ Հեռուստատեսությունում էլ այսօր, օրինակ՝ իմ հաղորդման պրոդյուսերը կին է՝ Լիդիա Քարամյանը։ Իմ՝ Utmazyan Coachings-ի PR աջակցութունն իրականացնում է Well PR Agency-ն, որի թիմը նույնպես ամբողջությամբ կանանցից է բաղկացած։ Այսպիսով, ինձ մոտ մի քիչ այլ կերպ է դա եղել, ինչի համար ես շատ շնորհակալ եմ և ուրախ։
Իսկ մինչ այժմ ո՞րն եք համարում Ձեր ամենամեծ ձեռքբերումը։
Գիտե՞ք, շատ բարդ է ասել ամենամեծը որն է, որովհետև այդ պահին այն, ինչ-որ դու անում ես, ամենամեծն է քեզ համար, անկախ նրանից ավարտելուց հետո հետ նայելով` որը մասշտաբներով ամենափոքրը կլինի, որը՝ ամենամեծը։ Բայց դա էլ է շատ հարաբերական, որովհետև այն ամենը, ինչ որ ես արել և անում եմ, ինձ համար հավասարապես կարևոր են եղել, ու ես հավասարապես մեծ ներդրում եմ ունեցել դրա մեջ իմ ուժերի, իմ աշխատանքի չափով։ Ամեն դեպքում այս պահին այդպես եմ կարծում։ Յուրաքանչյուր ձեռքբերում ինձ համար հավասար է։
Որո՞նք են այն ամենակարևոր ու եզակի անձնային հատկանիշները, որոնք Ձեզ օգնել են հաջողության հասնել Ձեր կարիերայում։
Միանշանակ կասեմ աշխատասիրությունը, իմ բծախնդիր մոտեցումը և պահանջկոտ լինելն առաջին հերթին իմ աշխատանքի և իմ նկատմամբ։ Կարծում եմ նաև չափազանց կարևոր են մարդկային հատկանիշները, երբ դու ունակ ես գնահատելու յուրաքանչյուր անդամի աշխատանքը։ Սա սեթևեթանք չէ, այլ ուղղակի իրական գնահատական։ Ես այս պահին կարող եմ (հասած լինելով այնտեղ, ուր հասել եմ) ասել, որ ամենակարևորը մարդկային հարաբերություններն են իմ կյանքի յուրաքանչյուր ոլորտում՝ թե՛ հեռուստատեսությունում, թե՛ նկարահանման հրապարակում, թե՛ ժամանակին իմ խմբագրությունում, թե՛ Utmazyan Coachings-ում, ինչպես արդեն ասեցի իմ աղջիկների հետ յուրաքանչյուր հատվածում։ Բայց եթե հստակ նշեմ, թե որ անձնային հատկանիշներն են իմ մեջ լավագույնս դրսևորվում, ապա աշխատասիրությունն ու պահանջկոտությունն իմ նկատմամբ։ Անընդհատ պետք է սովորես, հենց կանգնեցիր, ուրեմն ավարտված ես։
Լուսանկարների աղբյուրը՝ Հայաստանի Հանրային Հեռուստաընկերություն
Ինչպե՞ս է սկսվում աշխատանքային օրը Հրաչուհի Ութմազյանի մոտ։
Աշխատանքային օրն սկսվում է շատ դանդաղ, թեև ես ինքս իմ բնույթով չափազանց արագաշարժ մարդ եմ և կարող եմ զուգահեռաբար մի քանի բան անել։ Ես գիտեմ, որ մի քանի անգամ ավելի շատ բան եմ հասցնում իմ արագաշարժության և կարգապահության շնորհիվ, բայց իմ առավոտը սկսում է շատ դանդաղ։ Այսինքն՝ ինձ պետք է գոնե մեկ ժամ, որպեսզի ես հանգիստ արթնանամ, վայելեմ իմ սուրճն ու այդ մեկ ժամն ինձ թույլ եմ տալիս չշտապել։ Դրանից հետո արդեն սկսվում է օրն ու շարունակվում է։ Ես փորձում եմ այդ սկիզբը սիրուն դնել՝ ժպտալով անպայման։ Հատկապես հիմա, երբ առավոտյան արթնանում ես և տեսնում ես, որ արև է։ Սովորություն ունեմ՝ հենց առաջին հայելին տեսնում եմ, ժպտում եմ ինքս ինձ, ամենակարևորը, հետո արդեն՝ ծնողներիս։
Որպես հաջողակ կին՝ ի՞նչ խորհուրդ կտաք այն կանանց, ովքեր ցանկանում են ապահովել աշխատանք/կյանք հավասարակշռություն։
Գիտե՞ք, դա շատ ինդիվիդուալ է, և ամենահեշտը խորհուրդ տալն է, բայց փաստացի բավականին բարդ բան է դա։ Ամենակարևոր բանը, որ ես խորհուրդ կտամ կանանց, երբևէ չմոռանալ իրենց մասին, որովհետև մենք շատ անձնազոհ ենք և շատ հաճախ շատ բաներ մեր իսկ հաշվին ենք անում, մեր իսկ ժամանակի, մեր իսկ առողջության։ Դա լավ է, իհարկե, բայց մյուս կողմից էլ պետք է վարվել ճիշտ ինչպես ինքնաթիռում․ թթվածնի այդ դիմակը, որ իջնում է, առաջինը դու պետք է հագնես, նոր հագցնես երեխայիդ։ Փորձեք օրվա մեջ մի փոքրիկ հատված հատկացնել ձեզ։ Թե դուք ինչ կանեք ձեր ժամանակի ընթացքում, դա ձեր գործն է։ Պատուհանի առաջ սուրճ կխմեք, 15 րոպե կզբոսնեք, կզբաղվեք յոգայով կամ կդիտեք սիրելի սերիալ, կապ չունի, բայց այդ ձեր ժամանակն անպայման պահեք, որովհետև դա նման է հեռախոսի մարտկոցին։ Այսպիսով, չպետք է մոռանալ մարտկոցը լիցքավորելու մասին։
Միանալով International Women’s Day #ChooseToChallenge շարժմանը՝ կնշե՞ք ինչ նշանակություն ունի Ձեզ համար կանանց միջազգային օրը։
Ես չեմ սիրում կանանց միջազգային օրը։ Ես չեմ սիրում միջազգային օրերը։ Ես կարծում եմ, որ մենք պետք է այնպես ապրենք, որ հիշեցման կարիքը չլինի, որ այդ օրը մեր միջազգային օրն է։ Ես ուզում եմ, որ մենք ամեն օր դա հիշենք և մեզ շրջապատենք այնպիսի մարդկանցով, ովքեր ամեն օր կհիշեն և կգնահատեն մեզ։ Իսկ կանանց ցանկանում եմ, որ հիշեն, որ իրենք անսահմանափակ են։ Ոչ մի տեսակի սահմանափակում չկա։ Յուրաքանչյուր տարիքում կարելի է սկսել նորից թե՛ անձնական կյանքում, թե՛ գործնական կյանքում և նվաճել նորանոր բարձունքներ։ Միայն մենք ենք սահմանափակում ինքներս մեզ։ Եթե անգամ մենք թույլ ենք տալիս, որ մեզ դրսից սահմանափակեն, էլի մենք ենք սահմանափակում, որովհետև թույլ ենք տալիս։ Այս սկզբունքը ես փորձում եմ կիրառել նաև ինքս ինձ վրա՝ հասկանալով, որ ես կարող եմ հասնել այնտեղ, ուր ես իսկապես ուզում եմ։ Մենք այն ենք, ինչ որ իսկապես պատկերացնում ենք, որ կարող ենք լինել։
Հրաչուհի, շնորհակալ ենք հարցազրույցի համար, անչափ կարևոր զրույց էր, որը շատ շատերին կոգեշնչի կոտրելու սահմանափակման բոլոր արգելքները և նվաճելու նորանոր հորիզոններ մասնագիտական տարբեր ասպարեզներում։
