Ակնհայտ է, որ կրեատիվ աշխատանքը պահանջում է կրեատիվ ու հարմարավետ միջավայր: ԱՀա և ներկայացնում ենք այն 10 ընկերությունները, որոնց այցելել ենք 2022թ.-ին, և որոնք ստեղծել են ամենահարմարավետ ու էրգոնոմիկ կառուցվածքով գրասենյակները Հայաստանում՝ տրամադրելով աշխատավայրի լավագույն պայմաններն իրենց աշխատակիցներին։
2023թ.-ին շարունակելու ենք մեր այցերը տարբեր գրասենյակներ, իսկ մինչ այդ ամփոփ ներկայացնենք այդ 10 լավագույն գրասենյակները։
Picsаrt-ի ազատությունը, թափանցիկությունը և բազմատաղանդ թիմը
Թումո ստեղծարար տեխնոլոգիաների կենտրոնի շենքում գտնվող Picsart-ի արվեստի շունչ ու տրամադրություն հաղորդող գրասենյակը այն լավագույններից է, որտեղ այցելում է Հայաստան ժամանած յուրաքանչյուր պատվավոր ու անվանի հյուր, որոնց ստորագրություններին անգամ առանձին պատ է հատկացված։
«Picsart-ը կարող է մարդուն սուպերհերոս դարձնել», այս գաղափարով էլ առաջնորդվելով Picsart-ը 10 հոգանոց թիմից դարձավ 1000, արդյունքում էլ նույն շենքում նոր հարկ զբաղեղցնելով։
Ընդհանրապես Picsart-ում կարողանում են պահել կյանքի և աշխատանքի բալանսը, որպեսզի թե՛ մեկը, թե՛ մյուսը միշտ հաճույք պատճառեն, իսկ աշխատակիցները լինեն մոտիվացված ու երջանիկ։ Եվ այս ամենն արվում է առավելագույն կրեատիվ գրասենյակային լուծումներով։
QLess-ի տաքուկ միջավայրը և գողտրիկ անկյունները
Qless միջազգային ընկերությունը, որը զբաղվում է հաճախորդների հետ հարաբերությունների կառավարման համակարգի (CRM) մշակմամբ ու ապահովմամբ, իր գրասենյակը Հայաստանում բացել է ընդամենը 2022թ. մարտին։ Գրասենյակ հիմնելիս առաջնային սկզբունքը ջերմ ու աչքը շոյող մթնոլորտի և առանձին ֆունկցիոնալ տարածքների՝ ներդաշնակության ապահովումն է եղել։
Գրասենյակում ստեղծված են բոլոր անհրաժեշտ պայմանները հանգստի, ստեղծագործ աշխատանքի, տեխնիկական քննարկումների ու առհասարակ աշխատանքային հանդիպումների համար։
FAST-ի ջունգլին, բույսերը, ազատությունն ու մեդիտացիան
FAST-ի գրասենյակի վառ ու տրամադրող միջավայրում ստեղծվում և կյանքի են կոչվում Հայաստանի ապագայի համար կարևոր գիտական, կրթական և նորարարական նախագծեր։
Հիմնադիր տնօրեն Արմեն Օրուջյանի խոսքով՝ այս տարածքում գրասենյակը հիմնելու ամենամեծ մարտահրավերը այդ ամայի տարածքին «կյանք տալն» էր, որն էլ իրագործվեց բուսականության, վառ գույների և, իհարկե, լավ մարդկանց միջոցով։ Գրասենյակում առատ բուսականության ապահովման գաղափարի հիմքում տեխնոլոգիաների և բնության միաձուլումն է։
Գրասենյակի աշխատանքային հատվածը open space-ի սկզբունքով է, ընդհանրապես գրասենյակի ողջ տարածքում գերիշխում է ազատության ու բաց լինելու սկզբունքը: FAST այցելելիս նաև հատուկ ուշադրության է արժանի Zen` մեդիտացիայի սենյակը:
Digitain՝ նորարարության և հայկականության խաչմերուկում
Դեպի Արարատ լեռ և Երևանյան լիճ բացվող գեղեցիկ տեսարանով է առանձնանում Digitain-ի գրասենյակը։
Ընկերության 11 հարկերից յուրաքանչյուրն ունի իր յուրօրինակ լուծումը, իսկ 10-րդ հարկի պատերն ու առաստաղը զարդարում են հայկական զարդանախշեր՝ ներդաշնակ կերպով համադրելով նորարարականն ու ազգայինը:
Գրասենյակի կահավորվածությունը, հանդիպման սենյակների ամրագրման համակարգը, աշխատասենյակների տեխնիկական հագեցվածությունը և առհասարակ միջավայրը Դիջիթեյնում «խոսում է» նորարարության լեզվով, ինչն էլ ոգեշնչման աղբյուր է հանդիսանում նորարարության և գյուտարարության խթանման համար:
ՀայՓոստի «ոչ փոստային» գլխամասը, ամենասեղանը և «վեդռո փարթիները»
Նորարարական մոտեցումները մուտք գործեցին նաև բոլորիս հայտնի ՀայՓոստի գրասենյակներ։ Լիովին վերափոխվել է ՀայՓոստի գլխամասային գրասենյակի 9-րդ հարկը, որտեղ աշխատում են ընկերության մարքեթինգի և ՏՏ թիմերի տասնյակ մասնագետներ:
Ժամանակակից open space կոնցեպտով ստեղծված աշխատանքային հատվածների մեջտեղում է գտնվում գրասենյակի գլխավոր սեղանը, որը իր հատուկ խորհուրդն ունի ՀայՓոստում։ Հենց այս սեղանի շուրջ է տեղի ունենում ցանկացած կարևոր իրադարձություն՝ մեծ նախագծերի քննարկումից մինչև ծնունդներ և անգամ «հայփոստցիների ձեռնադրման արարողությունը» «Վեդռո փարթիի» շրջանակում։
CodeSignal-ի մեծ խոհանոցը, քնելու անկյունը,
գրքերն ու խաղերը
2022թ. սկզբին CodeSignal ընկերությունը տեղափոխվեց նոր ավելի մեծ ու հարմարավետ գրասենյակ, որը պայմանավորված էր մեծ ներդրումներով ու թիմի արագ աճով։
CodeSignal-ի գրասնեյակի առանձնահատկությունն այն է, որ գրասենյակն ամբողջությամբ արտացոլում է ընկերության մշակույթը ու թիմի սովորույթները. Open space, բայց առանձին թիմերի համար ստեղծված հարմարություններով, ձայնամեկուսացված կոնֆերանս սրահներ, թեժ շախմատային մենամարտերի, սեղանի խաղերի, կինոդիտումների ու երեկույթների համար ստեղծված հարմար զոնաներ։
Յուրահատուկ ուշադրություն գրավեցին սենյակները, որոնք անվանակոչված են ծրագրավորման լեզուների և դրանք ստեղծող ծրագրավորողների անուններով՝ Python (Գվիդո վան Ռոսում), C++ (Բյորն Ստրաուստրուպ), JavaScript (Բրենդան Այկ), Java (Ջեյմս Գոսլինգ)։
VOLO-ի պրոֆեսիոնալ աշխատանքային և ընտանեկան միջավայրի գաղտնիքը
VOLO ընկերությունը, հիմնադրվելով 2006 թվականին, ամենաինովացիոն աութսորսինգ մատուցող ընկերությունն է ամբողջ աշխարհում։
Հետաքրքիր և մտածված, ազատ, բայց միշտ պրոֆեսիոնալ, ոճային, նաև ֆունկցիոնալ: Այսպիսին է VOLO-ի գրասենյակն իր տաք գույներով։
Ուշագրավ է, որ VOLO-ն առաջին ՏՏ կազմակերպություններից է եղել Հայաստանում, որը սովետական ոճի գրասենյակներից անցում է կատարել ավելի ոճային, ժամանակակից ու միասնական open space ձևաչափին: Երեք հարկից բաղկացած գրասենյակում այնպիսի հետաքրքիր զոնաներ կան, որոնք ապահովում են աշխատակիցների թե’ աշխատանքի, թե’ հանգստի լիակատար հնարավորությունները։
Simply-ի նորաբաց երկրորդ գրասենյակը
Մեր հաջորդ այցը Simply-ի նորաբաց գրասենյակ էր։ Ազատ, թափանցիկ, պարզ, ուրախ, բայց միևնույն ժամանակ դասական ու լուրջ միջավայր աշխատանքի համար։
Գրասենյակին տրվել են այնպիսի լուծումներ, որոնք միանգամից հուշում են Simply-ի՝ «House of JavaScript»-ի մասին։
Այս նոր գրասենյակի առանձնահատկությունը ավելի ընդարձակ լինելն է, իսկ աշխատակիցներն արդեն հասցրել են ունենալ իրենց ամենասիրելի թե աշխատանքի, թե հանգստի զոնաները. Տերասա, աուդիտորիում, տրամադրող խոհանոց, և, իհարկե, խաղերի զոնա։
EasyDMARC-ի լուսավոր ու ջերմ աշխատանքային միջավայրը
EasyDMARC-ում Open space ձևաչափը արտացոլում է ընկերության արժեքները: Ընկերությունում գրեթե պատեր չկան և բաժանումներն արված են բացառապես ապակուց։
Չնայած աշխատանքի ու հանգստի համար ստեղծված հարմարավետ զոնաները շատ են, սակայն խոհանոցը չի զիջում իր դիրքը՝ շարունակելով զբաղեցնել թիմի սիրելի անկյուններից առաջին հորիզոնականը:
Գրասենյակում նաև հատուկ առանձնացված է մերսման սենյակ, որտեղ օրվա որոշակի ժամերին կարելի է այցելել և հանգստացած վերադառնալ աշխատանքի:
DataArt Armenia-ի էրգոնոմիկ գրասենյակն ու լավագույն ավանդույթները
2022թ. DataArt-ի համար նույնպես նշանավորվեց նոր՝ ավելի ընդարձակ ու հարմարավետ գրասենյակի բացմամբ: Գրասենյակում ամեն ինչ այնքան գրագետ է կազմակերպված, որպեսզի լուծվի սովորաբար open space-երին բնորոշ կարևոր խնդիրը՝ աղմուկը։
Գրասենյակի երկու հարկում էլ շատ տպավորիչ են «գաղտնիք» պարունակող ձայնամեկուսիչ բաժանարարները։ Առաջին հայացքից ինտերիերի մաս կազմող ձայնամեկուսիչները հատուկ դետալային դիզայն են ստացել շախմատի ֆիգուրաների տեսքով, որոնք Տիգրան Պետրոսյանի հաղթական պարտիաներից են։
Գրասենյակում առկա են աշխատանքային զոնաներ, խոհանոցային զոնաներ, պրեզենտացիաների համար նախատեսված զոնա, որն ամֆիթատրոնի ձևաչափով է կառուցված, հանդիպումների սենյակներ, տարբեր խաղերով հագեցած խաղասրահ, ամբողջությամբ կահավորված մարզասրահ, սուրճի անկյուններ, հանգստի զոնաներ, և թիմի կողմից շատ սիրված սրճարանի նման հատված, որը coworking զոնայի է հիշեցնում։
